ՌԴ գլխավոր դատախազությունը Ռուսաստանում անցանկալի է ճանաչել ամերիկյան և բրիտանական Elton John AIDS Foundation-ի գործունեությունը։ Այդ մասին տեղեկանում է «Ինտերֆաքս» գործակալությունից:
«Որոշում է կայացվել Elton John AIDS Foundation ոչ կառավարական կազմակերպությունների գործունեությունն անցանկալի ճանաչելու մասին: Կազմակերպությունն սկզբնապես հիմնադրվել է 1992 թ. ԱՄՆ-ում: 1993 թ. արդեն Մեծ Բրիտանիայում ևս մեկ ոչ կառավարական կազմակերպություն է գրանցվել նմանատիպ անվանմամբ», – ապրիլի 3-ին հաղորդել են հսկիչ գերատեսչությունում։
Երկու կազմակերպությունների հիմնադիրը բրիտանացի երաժիշտ Էլթոն Ջոնն է։
«Դրանց գործունեության նպատակն է՝ աջակցություն ցուցաբերել հասարակական միավորումներին առավել խոցելի խմբերի շրջանում ՁԻԱՀ-ի կանխարգելման և դրա դեմ պայքարի, ինչպես նաև ՄԻԱՎ-ով վարակվածների և ոչ ավանդական հայացքներ ունեցող անձանց նկատմամբ խտրականության ու արհամարհանքի հաղթահարման համար», – հաղորդել են դատախազությունում։
Միևնույն ժամանակ դատախազությունում նշել են, որ կազմակերպություններն «ավելի շատ կենտրոնացած են ոչ ավանդական սեռական հարաբերությունների, ընտանիքի արևմտյան մոդելների, սեռափոխության քարոզչության վրա»։
«Բացասական վերաբերմունք ունեն ավանդական հոգևոր և բարոյական արժեքները պաշտպանող երկրների քաղաքականության նկատմամբ։ Հատուկ ռազմական գործողության մեկնարկից ի վեր մասնակցում են Ռուսաստանին նսեմացնելու ուղղությամբ Արևմուտքի տեղեկատվական արշավին», – նշել են դատախազությունում։
Գերատեսչությունում հավելել են, որ ՌԴ-ում բրիտանական հիմնադրամը սերտորեն համագործակցում է ոչ առևտրային կազմակերպությունների հետ, որոնք կատարում են օտարերկրյա գործակալների գործառույթներ։
