ՀՀ ֆինանսների նախարարությունը ՀՀ կառավարության քննարկմանն է ներկայացրել «ՀՀ 2012 թվականի պետական բյուջեի մասին» ՀՀ օրենքի նախագիծը, որով առաջարկվում է հաջորդ տարվա պետական բյուջեն հաստատել`
Եկամուտների գծով՝ 910 մլրդ դրամ,
Ծախսերի գծով՝ 1 տրիլիոն 42 մլրդ դրամ,
Դեֆիցիտը՝ 132 մլրդ դրամ:
Եկամուտների աճը 2011 թվականի համար հաստատված 852 մլրդ 400 մլն դրամի համեմատությամբ կանխատեսվում է 6.8%: Նախագծի ծախսային մասը 2011 թվականի ՀՀ պետական բյուջեի հաստատված մակարդակի համեմատ ավելացել է շուրջ 41 մլրդ 500 մլն դրամով: Ծախսերի ամբողջ ծավալի 86.1%-ը կամ 897 մլրդ 800 մլն դրամը բաժին է ընկնում ընթացիկ ծախսերին, 13.9 %-ը կամ 144 մլրդ 700 մլն դրամը՝ ոչ ֆինանսական ակտիվների գծով զուտ ծախսերին:
Սոցիալական բնագավառի ծախսերի (կրթություն, առողջապահություն, սոցիալական ապահովություն) տեսակարար կշիռը բյուջետային ծախսերի ամբողջ ծավալում կազմում է 46.2%, պաշտպանության, հասարակական կարգի պահպանության և ազգային անվտանգության ապահովման ոլորտներինը՝ 19.8%, տնտեսության ճյուղերինը՝ 13.2%, պետական պարտքի սպասարկմանը՝ 4.5%, համայնքների բյուջեներին ՀՀ պետական բյուջեից պաշտոնական դրամաշնորհների տրամադրմանը (ֆինանսական համահարթեցման դոտացիաներ)՝ 3.1%, ՀՀ կառավարության պահուստային ֆոնդի ձևավորմանը՝ 2.0%:
Նախատեսվող դեֆիցիտի գումարը 2011 թվականի պետական բյուջեով հաստատված և 2010 թվականի պետական բյուջեի կատարման արդյունքներով փաստացի ձևավորված ցուցանիշների նկատմամբ նախատեսված է համապատասխանաբար` 16 մլրդ 100 մլն դրամ և 41 մլրդ 800 մլն դրամ նվազումով: Դեֆիցիտ/ՀՆԱ հարաբերակցության ցուցանիշը կանխատեսվում է 3.1 %-ի չափով` 2011 թվականի համար ծրագրված և 2010 թվականի փաստացի ցուցանիշների՝ համապատասխանաբար 3.95%-ի և 4.98%-ի դիմաց:
2012 թվականի ՀՀ համախմբված բյուջեն կանխատեսվում է եկամուտների գծով՝ 937 մլրդ 200 մլն դրամ, ծախսերի գծով՝ 1 տրիլիոն 69 մլրդ դրամ և դեֆիցիտը՝ 132 մլրդ 500 մլն դրամ:
ՀՀ համայնքների բյուջեների ծավալը գնահատվել է եկամուտների գծով՝ 96 մլրդ 4 մլն դրամ և ծախսերի գծով՝ 96 մլրդ 400 մլն դրամ: Ընդ որում 2012 թվականի եկամուտները կանխատեսվում են 2010 թվականի փաստացիի նկատմամբ շուրջ 11 մլրդ 500 մլն դրամով, իսկ 2011 թվականի համար համայնքների կողմից ծրագրվածի համեմատությամբ` շուրջ 2 մլրդ 8 մլն դրամով ավելի:
