Ադրբեջանական APA լրատվական գործակալության փոխանցմամբ՝ ԵՄ արտաքին քաղաքականության ու անվտանգության հարցերով բարձրագույն հանձնակատար Քեթրին Էշթոնը սեպտեմբերի 27-ին մասնակցել է Ստրասբուրգում տեղի ունեցած Եվրախորհրդարանի նիստում «Արևելյան գործընկերության» վերաբերյալ քննարկումներին։
Էշթոնն ընդգծել է, որ ԵՄ-ը շահագրգռված է «Արևելյան գործընկերություն» ծրագրի շրջանակներում ընդգրկված երկրների հետ համագործակցությամբ. «Այդ ծրագիրը բխում է նաև մեր շահերից, քանի որ այն ուժեղացնում է մեր անվտանգությունն ու բարգավաճումը։
Ղարաբաղի, Մերձդնեստրի, Աբխազիայի ու Հարավային Օսիայի հակամարտությունները առաջընթացի գրանցման ճանապարհին ընկած գլխավոր խոչընդոտներն են։ Մենք ակնկալում ենք, որ տարածաշրջանում մեր արևելյան գործընկերները կանեն հնարավոր ամեն բան՝ տվյալ հակամարտությունների խաղաղ կարգավորման գործընթացում աճ գրանցելու համար։
ԵՄ համար ռազմավարական առաջադրանք է հանդիսանում այդ հակամարտություններից բխող բազմաթիվ խնդիրների լուծմանն ուղղված նպատակամղված ջանքերը»։
Հիշեցնենք, որ ԵՄ կողմից ստեղծված «Արևելյան գործընկերություն» նախագիծը միտված է նրան, որ Հայաստանը, Ադրբեջանը, Վրաստանը, Մոլդովան, Բելառուսը և Ուկրաինան է՛լ ավելի մերձենան ԵՄ-ին:
Թեև այն չի ենթադրում անդամակցություն ԵՄ-ին, այնուամենայնիվ, նախատեսում է քաղաքական ու տնտեսական մերձեցում: Այս ծրագրի մեկնարկը տրվել է 2009 թվականի մայիսի 7-ին՝ Պրահայում կայացած ԵՄ գագաթնաժողովում:
