Նոյեմբերի 21-ին Գերմանիայի արտաքին գործերի նախարար Անալենա Բերբոկը ՄԱԿ-ի Կլիմայի հարցերով խորհրդաժողովի նստավայրում մամուլի ասուլիս է հրավիրել: Այդ մասին Ադրբեջանի իշխանական և «պատասխանատու» լրատվամիջոցները որևէ տեղեկություն չեն տարածել: «Ազատություն» ռադիոկայանի ադրբեջանական ծառայությունը, որի գործունեությունն Ադրբեջանում արգելված է, հղում անելով «Թուրան» գործակալությանը, հայտնում է, որ Բերբոկը եվրոպացի միակ պաշտոնյան է, որ Բաքվում հրապարակային քննադատության է ենթարկել Իլհամ Ալիևի կառավարությանը:
Գերմանիայի արտաքին գործերի նախարարը բացահայտել է, որ Բաքու կատարած նախորդ այցի ընթացքում ադրբեջանցի պաշտոնյաների հետ քննարկել է մարդու իրավունքների և ազատությունների հարցը, բայց «անցած ժամանակահատվածում որևէ փոփոխություն չի արձանագրվել»: Անալենա Բերբոքն Ադրբեջանում մարդու իրավունքների և ազատությունների հետ իրավիճակը բնութագրել է «այլևս անտանելի»:
Նա, ընդսմին, շատ կարևոր բացահայտում է արել, որ կալանավորված լրագրողների գործն առնչվում է նաև Գերմանիայի շահերին: Անցած տարեվերջին Բաքվի լրատվամիջոցները հայտնել են, որ Գերմանիայի դեսպանը հրավիրվել է Ադրբեջանի ԱԳՆ, որտեղ նրան զգուշացրել են «ադրբեջանական օրենքները խախտելու» մասին: Գերմանիայի դեսպանատունն այդ առթիվ պաշտոնապես հաստատել է, որ կալանավորված լրագրող Մոհամադ Կեկելովը, իրոք, գերմանական մի հիմնադրամից դրամաշնորհ է ստացել, բայց պայմանագիրը օրինական է, քանի որ Կեկելովը, որպես հետաքննող լրագրող, Ադրբեջանի օրենսդրությամբ սահմանված կարգով հավատարմագրված է:
Հիշեցնելով, հավանաբար, այդ միջադեպը՝ Գերմանիայի արտաքին գործերի նախարարն «անթույլատրելի» է գնահատել իրավիճակը, երբ Ադրբեջանի իշխանությունները՝ հիմք ընդունելով «չճշտված կասկածները», մարդկանց արգելում են մեկնել արտերկիր: Նա, մասնավորապես, վկայակոչել է դոկտոր Իբադօղլուին, որ գտնվում է տնային կալանքի տակ և Գերմանիա մեկնելու, որակյալ բժշկական զննություն անցնելու, բուժում ստանալու իրավունքից զրկված է: Անալենա Բերբոքը «բացարձակապես անհիմն և անընդունելի» է որակել Եվրամիության, եվրոպական երկրների և ինստիտուտների հասցեին Ադրբեջանի իշխանությունների վերջին ելույթները և հավաստիացրել, որ նշված բոլոր հարցերը քննարկելու է ադրբեջանցի պաշտոնակցի հետ հանդիպմանը:
Բաքվի լրատվամիջոցներն առայժմ Ջեյհուն Բայրամով-Անալենա Բերբոք հանդիպման և բանակցությունների մասին տեղեկություն չեն տարածել: Չի բացառված, որ Բերբոքի մամուլի ասուլիսից հետո ադրբեջանական կողմը չեղարկի նրա հետ Բայրամովի հանդիպումը: ԱՄՆ կոնգրեսական Փալոունի հետ սկանդալից հետո ամեն ինչ սպասելի է:
Այդուհանդերձ, շատ որոշակի իմաստով COP 29-ը պաշտոնական Բաքվի համար բումերանգի էֆեկտ է ունենում: Գրեթե ամեն օր խորհրդաժողովի սրահներից անվտանգության ծառայությունը հեռացնում է բողոքի ակցիայի մասնակիցներին: Հերթական միջադեպը տեղի է ունեցել նոյեմբերի 22-ին տարբեր երկրներ ներկայացնող ակտիվիստները խորհրդաժողովի նիստերի դահլիճի նախասրահում բողոքի լուռ ակցիա են անցկացրել:
Նրանց պարզած ցուցապաստառն ազդարարել է. «Մարդու իրավունքները դանդաղ մեռնում են»: Միջազգային խորհրդաժողովը ոչ միայն բացահայտել է, որ Ադրբեջանը մթնոլորտ աղտոտող երկրների շարքում առաջատարն է, նրա էներգետիկ համակարգը հանրային վերահսկողությունից դուրս է և կոռումպացված, այլև հրապարակայնացրել, որ Իլհամ Ալիևը ոչ թե քաղաքական լեգիտիմ իշխանության կրող, այլ բռնապետ է: Այդ տպավորությունը, երևում է, մասնակից երկրների մեծամասնության մոտ վերածվել է համոզմունքի: Այլ հարց է, թե քաղաքական ի՞նչ հետևանքներ կունենա COP 29-ի բումերանգը:
