«ՀԱԿ-ը փորձեր կանի երկրում իրավիճակը սրելու համար, բայց համոզված եմ, որ գործը բախումների չի հասնի»,- այս մասին մեզ հետ զրույցում նշեց ԱԺ ՕԵԿ-ական պատգամավոր Խաչիկ Հարությունյանը՝ գնահատելով Լևոն Տեր-Պետրոսյանի ելույթը և իշխանությունների վրա ճնշումն ուժեղացնելու և հանրահավաքային պայքարին նոր լիցք ու թափ հաղորդելու նրա որոշումը:
«Տեսեք, Լևոն Տեր-Պետրոսյանն անձամբ հայտարարեց, որ երկրի ներքին քաղաքականությունը կարող է վնասել ընդհանուր շահերին, որովհետև մենք ունենք նաև արտաքին ագրեսիայի վտանգներ: Տեսեք, ժողովուրդն անձամբ է հասկանում, որ Լևոն Տեր-Պետրոսյանը մի երկու ամիս առաջ մի բան էր ասում, հիմա՝ մեկ այլ բան: Ինչո՞ւմն է բանը: Եթե Տիգրան Առաքելյանի հետ կապված խնդիր է, մենք դեռևս իսկապես չգիտենք նա քրեական հանցագործ է, թե ոչ: Քննությունը դեռ շարունակվում է: Հետևաբար՝ երկրի ներքին և արտաքին վտանգները մի կողմ թողած, այս ամենը կապել մի մարդու հետ և փորձել նրան քաղբանտարկյալի կերպար հագցնել՝ ինձ թվում է, որ դա այս պահին ճիշտ չէ»,- ավելացրեց Խաչիկ Հարությունյանը, ով նաև երկխոսության կոալիցիոն պատվիրակության անդամ է:
