Այսօր Ազատության հրապարակում մի խումբ երիտասարդներ հավաք էին կազմակերպել` Ասկերանի զորամասում խելագարված երիտասարդ Հովհաննես Վարդանյանի ծնողներին օգնելու համար: Նախաձեռնությունը ծնվել էր Facebook սոցիալական ցանցում, երբ երիտասարդները տեսել էին «Չենք լռելու» նախաձեռնության տարածած տեսանյութը տղայի մասին, ով հոգեբուժարանում է հայտնվել` դեռ ժամկետային զինծառայությունը չավարտած:
Երիտասարդ ակտիվիստների ֆինանսավորմամբ կազմվել էին բուկլետներ և պաստառներ տղայի բուժմանը աջակցելու համար բացված հաշվեհամարը տարածելու և նրա ծնողներին օգնելու նպատակով, քանի որ տղան բուժման կարիք ունի արտերկրում, որի հնարավորությունը նրա ծնողները չունեն:
Նշենք, որ տղան այժմ գտնվում է Նորք-Մարաշ հոգեբուժական դիսպանսերում և լուրջ բուժման կարիք ունի, իսկ օգնել ցանկացողները կարող են գումար փոխանցել ԱրդշինԻնվեստԲանկում տղայի հոր` Վարդան Վարդանյանի անունով բացված հաշվեհամարին` 2474300498710010:
Հոգեբուժական դիսպանսերի տնօրեն Անաիդա Գևորգյանը օրեր առաջ ասել էր, որ տղայի մոտ հոգեկան խրոնիկական շիզոֆրենիա է, որով տառապում է նաև ծնողներից մեկը, սակայն այս հայտարարությունը այսօր «Առաջին լրատվականի» հետ զրույցում հերքեց Հովհաննես Վարդանյանի մայրը՝ Անահիտ Այվազյանը, հավաստիացնելով, որ տարիներ առաջ միայն գլխի հարված է ունեցել, որից հետո առողջական խնդիրներ են առաջացել, բայց ոչ ավելին:
Շիզոֆրենիա՝ չդիֆերենցված ձև. սա տղայի հիվանդության բժշկական ախտորոշումն է: Հիվանդությունը կարող է մեղմվել արտերկրում բուժմամբ, քանի որ տղայի մոտ հիվանդությունը նոր է սկսվել:
«Իմ տղան սադիզմի զոհ է, զոհ է անտարբերության, անօրինության: Առաջին հերթին ցանկանում եմ բուժում ստանա արտերկրում: Սա մահվանից էլ վատ է՝ տեսնել երեխային նման վիճակում: Հովհաննեսը երկու անգամ բուժզննում է անցել և շատ աշխատող էր, անմիջապես աշխատանքի անցավ. մեր բակում կար ցեմենտի կետ, այնտեղ ցեմենտը տեղավորում էր պարկերի մեջ, հետո բարձում էր մեքենայի վրա, աշխատում էր չնչին գումար, բայց դա էական չէր, կարևորը նա իդեալական առողջ և պինդ տղա էր` երկաթյա առողջության: Երբեք որևէ նշան չեմ նկատել, նա մեր ազգին բնորոշ բնավորությամբ երիտասարդ է` ընկերոջը հասնող, կայուն, երկաթյա բնավորությամբ, հեղինակություն, իսկ ժառանգականության հետ կապված խոսակցությունները պետք է հերքվեն, իմ մոտ էլ եղել է լոկ հարվածից»,- ցավով փաստեց Հովհաննեսի մայրը` հուսալով, որ որևէ փոփոխություն կլինի: Նա նաև նշեց, որ Հովհաննեսը, թեև անառողջ է, մի անուն է անընդհատ կրկնում, և ծնողները մտավախություն ունեն, որ իրենց որդու ներկայիս վիճակի համար այդ տղայի լուման մեծ է:
Հավաքի կազմակերպիչ Անի Էլոյանն ասաց, որ շատ ազդված են տղայի դեպքից: «Համացանցում տեսել ենք Հովհաննեսի տեսանյութը և որոշել օգնել նրա ընտանիքին ինչով հնարավոր է՝ և՛ ֆինանսապես, և՛ հոգեպես: Մեզնից ոմանք գնում են նաև հոգեբուժարան, ընկերացել են Հովհաննեսի հետ, բոլորս շատ մարտական ենք տրամադրված, պետք է պայքարենք արդարադատության համար»,- ասաց երիտասարդ ակտիվիստը` բոլորին կոչ անելով օգնել Հովհաննես Վարդանյանի ծնողներին:
