ԱՄՆ ֆինանսների նախարարությունն Իրանի վերաբերյալ պատժամիջոցների ցանկում ներառել է երեք ֆիզիկական և չորս իրավաբանական անձանց՝ ամերիկյան ապրանքներ և տեխնոլոգիաներ Իրան արտահանելու համար։ Այս մասին հաղորդում է գերատեսչության տարածած հաղորդագրությունը:
«Այսօր (խմբ.՝ փետրվարի 14-ին) ԱՄՆ ֆինանսների նախարարության Արտաքին ակտիվների վերահսկման գրասենյակը պատժամիջոցներ է սահմանել գնումների ցանցի նկատմամբ, որը պատասխանատու է ԱՄՆ-ի ավելի քան 20 ընկերությունների ապրանքների և տեխնոլոգիաների ապօրինի արտահանմանն օժանդակելու համար՝ նախատեսված Իրանում վերջնական սպառողների, ներառյալ՝ Իրանի կենտրոնական բանկի համար», – ասված է ԱՄՆ ֆինանսների նախարարության հայտարարության մեջ։
Պատժամիջոցներ են սահմանվել երկու ֆիզիկական անձանց նկատմամբ Իրանից և մեկի նկատմամբ՝ ԱՄԷ-ից, ինչպես նաև Իրանի, ԱՄԷ-ի և Թուրքիայի ընկերությունների նկատմամբ, որոնք, ըստ Վաշինգտոնի, կապված են Իրանի կենտրոնական բանկի հետ։
Ամերիկյան իշխանությունների տվյալներով՝ Իրանի կենտրոնական բանկի կողմից ձեռք բերված ապրանքների և տեխնոլոգիաների թվում եղել են տեղեկատվական անվտանգության ապահովմանն առնչվող առարկաներ:
ԱՄՆ-ն Իրանի կենտրոնական բանկին մեղադրում է Իսլամական հեղափոխության պահապանների կորպուսի «Ղոդս ուժերին» և «Հեզբոլլահ»-ին ֆինանսական աջակցություն տրամադրելու համար։
