ՔՊ խմբակցությունը որոշել է երաշխավորություն ներկայացնել ԱԺ նախագահի եղբոր կնոջ եւ Սիներջի ընկերության տնօրենի համար, նրանց կալանքից ազատելու նպատակով: Ինչպես հայտնի է, նրանք կալանավորվել են կոռուպցիոն աղմկոտ գործի շրջանակում: ՔՊ խմբակցության ղեկավարը լրագրողներին ասել է, որ երաշխավորություն ներկայացնելու որոշումը Փաշինյանի հետ քննարկված չէ՝ քննարկել են խմբակցության նիստում:
Սրան հավատալը մեղմ ասած դժվար է, հաշվի առնելով թեկուզ այն ընդգրկումը, որ իրավապահները տվել են գործին, կանգ չառնելով ընդհուպ աղմկոտ կալանավորումների առաջ: Իսկ դա կարող էին անել միայն Փաշինյանի համաձայնության դեպքում: Հետեւաբար, այդտեղ իրավիիճակ փոխելու համար եւս պահանջվելու է Փաշինյանի համաձայնությունը: Եվ այն հնարավոր է ստացվել է նախօրեին տեղի ունեցած Անվտանգության խորհրդի ընդլայնված նիստում: Ըստ էության, հնարավոր է ասել, որ ՔՊ երաշխավորությունը՝ կալանավորվածներին ազատելու առնչությամբ, ներիշխանական «հրադադարի» վերաբերյալ համաձայնություն է:
Հարց այն է, թե այդ համաձայնությունը վերաբերում է կոնկրետ գործի շրջանակի՞ն, թե՞ իշխանության գործունեության ներքին ու արտաքսին ուղղություններին եւ հանգամանքներին ընդհանրապես: Հարկ է նկատել, որ առաջիինի պարագայում «հրադադարի» համաձայնությունը կարող է լինել կենսունակ, այն կարող է պահպանվել, համենայն դեպս բավականին երկար, սակայն ընդհանուր առմմամբ իշխանության լայն գործունեության մասով ներիշխանական «հրադադարի» տեւական եւ կայուն համաձայնությունը գործնականում անիրատեսական է: Դրա պատճառները շատ են, ընդ որում թե օբյեկտիվ ու թե սուբյեկտիվ բնույթի:
Հայաստանի քաղաքական իշխանությունը կանգնած է ստատուս-քվոյի փոփոխության անհրաժեշտության առաջ: Այդ իշխանության ներկայիս ստատուս-քվոն, որը ֆորմալ իմաստով ձեւավորված լինելով 2021-ի արտահերթ ընտրությամբ, խորքային իմաստով շարունակում է լինել 2018-ի «արտադրության», իրեն սպառելլ է վաղուց: Ավելին, 2021-ին դրա կյանքը երկարացվել է արհեստական շնչառությամբ, մինչդեռ շուրջ տեղի են ունեցել հիմնահատակ փոփոխություններ, որոնք աստիճանաբար ավելի ու ավելի մեծացնելու են գոյություն ունեցող ներիշխանական ստատուս-քվոյի հանդեպ մթնոլորտային ճնշումը, առնվազն «գոլորշի բաց թողնելու» անհրաժեշտությունը դարձնելով ավելի ու ավելի կենսական:
