Հայկ Խանումյանը ֆեյսբուքյան իր էջում գրել է. Այս աղետի հիմքերը դրվել են 1999թ. դեկտեմբերին, երբ պաշտպանության բանակը ենթարկացվեց Երևանին։ Պատերազմում հաղթած, պատերազմի փորձը ծառայության վերածած բանակն աստիճանաբար դարձավ ծառայողների բյուրոկրատիա։ Պատերազմի փորձին ու ռազմական հմտությունների տեղայնացմանը փոխարինելու եկան հայերեն թարգմանված սովետական ռազմական կամոնագրքերը, կտրուկ իջավ կատարողական կարգապահությունը, բնավորություն ունեցող հրամանատարներին սկսեցին փոխարինել պատեհապաշտները, առանց տրամաբանության հրամաններ կատարողները։ Այս ամենի հետևանքով հայոց ամենամարտունակ զորամիավորումը` Պաշտպանության բանակը, 2020թ. ծանր պարտություն կրեց` չնայած թշնամուն ջարդելու բազմաթիվ հնարավորություններին և առկա ներուժին։
Բանակն այդ օրին հասցրած ինտրիգանները դրանով չհանգստացան, ամեն ինչ արեցին, որ Արցախում բանակ ստեղծածը չգա իշխանության, ավելին` Արցախում իշխանության բերեցին անվերապահորեն իրենց ցուցումները կատարողներին, որոնք ոչ մի կարողություն ու շնորք չունեն, նույնիսկ հանձնվող տեխնիկան խոտանելու խելք, և որոնք էլ օրեր անց լուծարեցին Պաշտպանության բանակը, ոչնչացրին Արցախի Հանրապետությունը, բանակի մեծաքանակ տեխնիկան ու սպառազինությունը հանձնեցին թշնամուն։ Ու այսօր գտնվում են մարդիկ` քաղաքական, հասարակական գործիչներ, մտավորականներ ու կարծիք ձևավորողներ, որոնք պաշտպանում են Երևանում ու Ստեփանակերտում ծվարած այս պետականասպան խմբակին, ավելին` նրանց թիմակիցն ու գաղափարակիցն են։
