Միարժեք է, որ Արցախի դեմ Ադրբեջանի սարձազերծած հարձակման նպատակը Հայաստանի ներքաղաքական, ներհասարակական կայունության խաթարումն է, թիրախը Հայաստանի պետականությունը։
Այն ինչ սանձազերծել է Ադրբեջանը Արցախի տարածքում դրա ուղղակի, անմիջական պատասխանատուն Ռուսաստանն է։ Ռուսաստանը, ռուս խաղաղապահները 2020թ․ նոյեմբերի 9-ի հայտարարությամբ արցախահայության անվտանգությունը ապահովելու պարտավորություն են ստանձնել։
Ռուսաստանն իր գործողություններով ի ցույց է դնում, որ ի վիճակի չէ և կամ չի ցանկանում կատարել դաշնակցային պարտավորությունները Հայաստանի նկատմամբ։
Արցախի դեմ Ադրբեջանի լայնամասշտաբ հարձակումը դատապարտելու փոխարեն Ռուսաստանի ԱԳ նախարարության ներկայացուցչի վերջին խայտառակ հայտարարությունները, Հայաստանը, Հայաստանի իշխանություններին թիրախավորող Ռուսաստանի առանձին քաղաքական և հասարակական գործիչների հայտարարությունները միանշանակ ապացույց են, որ Մոսկվան նպատակ է դրել Հայաստանի ներքին դավադիր գործակից ուժերի և անհատների հետ Հայաստանի ներսում հարուցել անկայունություն և օրինական իշխանական մարմինների դեմ ապօրինի գործողություններ։
Ռուսաստանից ստացված հրամանով տարիներ ի վեր Հայաստանի պետականության դեմ գործող դավադիր ուժերի ներկայացուցիչներ երևանյան ընտրություններում արձանագրված արդյունքներից ոգևորված փորձում են երկրում ստեղծված իրավիճակը օգտագործել Հայաստանի ներքին կայունությունն ու անդորրը խաթարելու և թշնամական, հակապետական, ռեվանշիստական գործընթացներ հարուցելու համար։
Ստեղծված իրավիճակում Հայաստանի Ազգային ժողովը պետք է հանդես գա Արցախի տարածքում Ադրբեջանի գործողությունները դատապարտող հայտարարությամբ։ Հայտարարությունը պետք է հստակ արձանագրի, որ ստեղծված իրավիճակի համար Ադրբեջանի հետ հավասարապես պատասխանատու է Ռուսաստանը, որը ոչ միայն չի կատարում նոյեմբերի 9-ի հայտարարությամբ ստանձնած պարտավորությունը, այլև Բաքվից և Մոսկվայից հնչող որոշ հայտարարություններից տպավորություն է ստեղծվում, որ երկու երկրները համաձայնեցված են իրականացնում ռազմարշավը Արցախի դեմ։
Ստեղծված իրավիճակի համար Հայաստանի Ազգային ժողովը պետք է դիմի միջազգային հանրությանը։ Առանձին դիմումներ պետք է հղել Մինսկի խմբի մյուս երկու համանախագահ երկրների՝ ԱՄՆ-ին և Ֆրանսիային։
Հայաստանի արտաքին քաղաքական գերատեսչության ղեկավարը, որը գտնվում է Նյու Յորքում այսօր մեկնարկող ՄԱԿ Գլխավոր Ասամբլեայի 78-րդ նստաշրջանի առթիվ, այսօր իսկ պետք է դիմի ՄԱԿ ԱԽ նիստ հարուցելու պահանջով։
Հանուն Հանրապետության կուսակցության քաղխորհուրդը, կուսակցական մարմինները Հայաստանի, հայ ժողովրդի համար ճակատագրական այս պահին մի կողմ է դնում իշխանության հետ ներքաղաքական բոլոր տարակածություններն ու տարաձայնությունները, անվերապահորեն վստահում է Հայաստանի իշխանությանը, իշխանական մարմիններին, զինված ուժերին։
Կոչ ենք անում բոլոր քաղաքական ուժերին մի կողմ դնել նեղ կուսակցական օրակարգերը և առաջնորդվել միայն և բացառապես պետական առաջնահերթ օրակարգով և շահով։
Արման Բաբաջանյան
Հանուն Հանրապետության կուսակցություն
նախագահ
Սեպտեմբերի 19, 2023թ․
Երևան
