Մենք մեծ ակնկալիքներ ունենք Բրյուսելում նախատեսված Փաշինյան-Ալիև-Միշել հանդիպումից և մնացած բոլոր հարթակներում հանդիպումներից, բայց այստեղ խնդիրն այն է, որ մենք ամեն անգամ տեսնում ենք Ադրբեջանի ապակռուցողական դիրքորոշումները՝ կապված խաղաղության պայմանագրի շուրջ ձեռք բերվող պայմանավորվածությունների հետ: Այս մասին «Առաջին լրատվական»-ի հետ զրույցում նշեց Արցախի ԱԺ պատգամավոր Արթուր Հարությունյանը:
«Ամեն անգամ տեսնում ենք, որ Ադրբեջանը, կոնկրետ եթե խոսքը Արցախի հակամարտության կարգավորման մասին է, փորձում է դա ներկայացնել որպես իր ներքին հարց, որ չի պատրաստվում որևէ մեկի հետ այդ հարցը քննարկել: Բայց ըստ էության, խաղաղության պայմանագրի առանցքային հարցերից մեկը նաև դա է, որի շուրջ Ադրբեջանի ապակառուցողական դիրքորոշումը թույլ չի տալիս, որ խաղաղության պայմանագիրը վերջնական տեսք ունենա: Այդ առումով նաև մեծ ակնկալիքներ ունենք այդ հանդիպումից: Ստեղծված իրավիճակը հումանիտար աղետ է արդեն: Ադրբեջանն ընդհանրապես փակել է ճանապարհը, մինչ այդ ռուս խաղաղապահների միջոցով իրականացվող հումանիտար բեռների մուտքն էր փակել, իսկ վերջին մի քանի օրերին նաև Կարմիր Խաչի միջոցով հումանիտար բեռների մուտքն է փակել: Սա կարող ենք դիտարկել ահաբեկչություն, հանցագործություն, որ Ադրբեջանի կողմից իրականացվում է Արցախի ժողովրդի նկատմամբ»,-ասաց նա:
