Հայաստանում Եվրամիության սահմանային դիտորդական առաքելության ղեկավար Ռիտերը հայտնել է, որ առաքելությունն առաջիկա ամիսներին ծրագրում է Ջերմուկում, Իջևանում ու Եղեգնաձորում բացել երեք նոր օպերատիվ ներկայացուցչություն, այդպիսով աստիճանաբար հասնելով լիարժեք ծավալման: Ըստ Ռիտերի, իրենց նպատակը Հայաստանի սահմանային վիճակի կայունությանը նպաստելն է, ու թեև շատ հայ պաշտոնյաներ արձանագրում են, որ կա այդ նպաստումը, այդուհանդերձ իրավիճակը դեռ ամբողջապես կայուն չէ: Ռիտերն իհարկե իրավացի է՝ իրավիճակը հեռու է ամբողջական կայունությունից: Սակայն, խնդիրը չի սահմանափակվում դրանով, այլ կա նաև հարցը, թե անկայունության դեպքերի առնչությամբ ինչպիսին է դիտորդական առաքելության արձագանքի մեխանիզմը, հատկապես, երբ Տեղի կամ Սոթքի միջադեպերի ընթացքում պարզվեց, որ այնտեղ դիտորդներ չեն եղել: Հետո էլ տեղեկություն հայտնի դարձավ, նույն Ռիտերի հարցազրույցից, որ դիտորդները Ադրբեջանին օրեր առաջ հայտնում են իրենց դիտարկումների «հասցեները»:
Բնական է, որ Բաքուն այդ «հասցեներում» նշված ժամանակահատվածում իրեն կպահի շար կարգին: Ի դեպ, այդ իրազեկման հանգամանքը թերևս այն «գինն» է, որով Բաքուն ընդունել է Հայաստան դիտորդական առաքելություն գործուղելու ԵՄ որոշումն ու այն չի դարձրել Բրյուսելի համար իր հետ հարաբերության քաղաքական խնդիր: Վերադառնալով դիտորդական առաքելության աշխատանքին և նոր օպերատիվ կենտրոններ հիմնելու մասին դրա ղեկավարի հայտարարությանը, արժե թերևս արձանագրել, որ հարկ է՝ որպեսզի առաքելությունը շտապի իր լիարժեք ծավալման հարցում: Այդ հրատապությունն առավել ակնառու է երկու օր առաջ Ադրբեջանի ԱԳՆ տարածած հայտարարության ֆոնին, թե չեն ընդունում Հայաստանի հետ սահմանազատման և սահմանագծման աշխատանքի որևէ քարտեզային հիմք:
Միաժամանակ, հաճախակիացել են Ադրբեջանի տարածած ապատեղեկատվությունները, թե հայկական կողմը պարբերաբար խախտում է հրադադարը: Դրանք նշաններ են, որ Բաքուն կարող է ծրագրել սահմանային հերթական որևէ սադրանք՝ Երևանին պայման թելադրելու համար: Հետևաբար, Եվրամիության դիտորդական առաքելությունը պետք է շտապի լիարժեք ծավալման հարցում, առավելագույնս արագ ժամկետում ամբողջացնի իր դիտորդական կարողություններն ու այդ կերպ բարձրացնի Ադրբեջանին զսպելու արդյունավետության աստիճանը, եթե այն կա ընդհանրապես: Այլապես կստացվի, որ ազդարարելով առաջիկա ամիսներին նոր օպերատիվ կենտրոններ ստեղծելու մասին, դիտորդական առաքելությունը ընդամենը «իրազեկում» է Ադրբեջանին, որ պետք է գործել, քանի դեռ չկա ԵՄ դիտորդների լիարժեք ծավալում: ԵՄ դիտորդական առաքելությունը պետք է բազմապատկի ծավալման արագությունը:
