Շաբաթներ առաջ Հորդանանի թագավոր Աբդալլա 2-րդը և Պաղեստինի նախագահ Մահմուդ Աբբասը հայտարարեցին, որ Երուսաղեմի հայոց Նուրհան պատրիարքն իշխանազուրկ պատրիարք է և որ նրան այլևս որպես պատրիարք չեն ճանաչում, քանի որ ապօրինի գործարք է իրականացրել։
Նշվել էր, որ երկու երկրներն այս որոշումն ընդունել են Նորին Մեծություն թագավոր Աբդալլահ II-ի և Պաղեստինի նախագահ Մահմուդ Աբասի ցուցումներից հետո, երբ հայոց պատրիարք Մանուկյանը առանց համաձայնության և խորհրդակցության, անշարժ գույքի հետ կապված գործարքներ է կատարել, որոնք ազդում են Սուրբ քաղաքի ապագայի վրա։
Հայտարարության մեջ նշվում է, որ Հորդանանի և Պաղեստինի որոշումը կայացվել է «գործարքից» հետո, որը կապված է «Կովերի այգի» անունով հայտնի Ալ-Բուստան տեղանքի և դրա շրջակայքի հետ, որը տարածվում է մինչև Բաբ Ալ-Խալիլում գտնվող «Ալ-Քիշլա» շենքը և որը կազմում է հայկական թաղամասի մեծ մասը:
Նշվում է, որ պատրիարք Մանուկյանին խնդրել են դադարեցնել որևէ միջոց, որը կազդի այս գույքի պատմաիրավական կարգավիճակի վրա, որը կփոխի դրանց ժողովրդագրական և աշխարհագրական բնույթը, սակայն նա չի պատասխանել դրանցից որևէ մեկին։
Հիշեցնենք, որ դեռ երկու տարի առաջ Նուրհան Պատրիարքը և պարետ Երիցյանը գործարք էին կնքել հրեա գործարարի հետ և 99 տարով վարձակալության հանձնել «Կովերի պարտեզ» կալվածքը: Հատկանշական է, որ 99 տարով տարածքը վարձակալությամբ տալու համաձայնագիրն անօրինական է հենց այն առումով, որ որևէ մեկն իրավունք չունի հայկական կալվածքներն 99 տարով վարձակալությանտալ, պատրիարքության կանոնադրությամբ, առավելագույն ժամկետը 49 տարին է:
Մայր Աթոռի տեղեկատվական համակարգի տնօրեն տեր Եսայի քահանա Արթենյանը նշել է, որ Ն․Ս․Օ․Տ․Տ․ Գարեգին Բ Ամենայն Հայոց Կաթողիկոսը վերջերս հեռախոսազրույց է ունեցել Երուսաղեմի Հայոց պատրիարք Ամենապատիվ Տ․ Նուրհան արքեպիսկոպոս Մանուկյանի հետ․ քննարկման ընթացքում Պատրիարք Սրբազանը Վեհափառ Հայրապետին տեղեկացրել է, որ քայլեր են ձեռնարկվում Պատրիարքարանի իրավունքների պաշտպանության և խնդրի բարվոք հանգուցալուծման համար։
Սաղիմահայ համայնքի ներկայացուցիչները «Առաջին լրատվական»-ի հետ զրույցում նշեցին, որ հայ համայնքը կոչ է անում Ն․Ս․Օ․Տ․Տ․ Գարեգին Բ Ամենայն Հայոց Կաթողիկոսին հետևողական լինել, որպեսզի չեղարկվի «Կովերի պարտեզ» կալվածքի գործարքը։
«Երուսաղեմի հայ համայնքը կոնկրետ քայլեր է պահանջում կաթողիկոսից: Այո, գիտենք, որ Գարեգին Բ ամենայն հայոց կաթողիկոսը հեռախոսազրույց է ունեցել պատրիարքի հետ, բայց չգիտենք՝ ինչ են խոսել, ինչ են քննարկել»,-ասաց «Առաջին լրատվական»-ի աղբյուրը՝ հավելելով, որ Երուսաղեմի երեք հայկական միությունները (ՀԵՄ, ՀՄԸՄ և ԵՀԲՄ) 3 օր առաջ հանդես են եկել հայտարարությամբ:
Հայտարարության մեջ ասվում է.
«Երուսաղեմում անցած շաբաթներին բազմաթիվ խաղաղ բողոքի ցույցեր տեղի ունեցան սաղիմահայ գաղութի կողմից՝ ընդդեմ Հայոց կալվածների նենգավոր վարձակալության։ Մասնավորապես ի հայտ եկան որոշ հանգամանքներ, որոնք ցույց են տալիս, որ հայտնի «Կովերի Պարտեզ» անունով տարածքը ապօրինաբար 99 տարով վարձակալությամբ տրվել է «XANA GARDENS» կազմակերպությանը և նրա վնասաբեր ազդեցությունը Հայոց թաղամասի և Հայության դիրքի և վարկի վրա Սուրբ քաղաքի մեջ։
Սաղիմահայությունը կտրուկ և լրիվ մերժում է պատմական «Կովերի Պարտեզի» և նրա շրջապատի 99 տարով ապօրինի վարձակալությունը։ Այս անօրինական վարձակալությունը մեծ վտանգ է Սուրբ Քաղաքի մնայուն խճանկարին։ Հետևաբար, կոչ ենք ուղղում Պատրիարքին՝ չեղարկել բոլոր այլ պայմանագրային այլ խոստումները, քանզի Հայոց թաղամասը բնական շարունակությունն է և կապն է Երուսաղեմի հին քաղաքի այլ թաղամասերի հետ։
Սաղիմահայ համայնքի մեծ մասը իր երախտագիտությունն է հայտնում այն գործադրված ջանքերի համար, որ Նորին Վսեմություն, Աբդալլահ Բ․ թագավորը, Հորդանանի Հաշիմական թագավորության և Վսեմաշուք, Պաղեստինի նախագահ Մահմուդ Աբասը, որ մեկ անգամ ևս վերահաստատեցին հաձնառու լինել Հայոց թաղամասի ամբողջականության և Հայոց Քրիստոնյա ներկայության պահպանման համար։
Մենք նաև հատուկ կոչ ենք ուղղում, մասնավորապես, Հայաստանի Հանրապետության, Ամենայն Հայոց Կաթողիկոս Ն.Ս.Օ.Տ.Տ. Գարեգին Բ.-ին, և աշխարհասփյուռ Հայության, ձեռք մեկնելու և աջակցելու համար Երուսաղեմի Հայ համայնքի պայքարին վասն արդարության և թափանցիկության։
Մենք՝ հայերս, պետք է միանանք և պայքարենք պաշտպանելու մեր 1600 տարվա ներկայության շարունականությունը Սուրբ Երկրին մեջ։ Որպէս միասնական համայնք, մենք պահանջում ենք պատասխաններ և թափանցիկություն բոլոր ապօրինական պայմանագրերին, որպեսզի կարողանանք դրանք չեղարկել և պաշտպանել Հայոց կալվածները ծրագրված ապօրինական վաճառքի փորձերից։
Առավել կարևոր է նշել, որ Տնօրեն Ժողովը և Միաբանական Ընդհանուր ժողովը չեն վավերացրել այս վարձակալության պայմանագիրը։ Բազմաթիվ հայտարարություններ հրապարակվեցին Երուսաղեմի եկեղեցիների կողմից, շեշտելով այն փաստը որ քրիստոնեական ներկայությունը վտանգված է Սուրբ Քաղաքի մեջ ծայրահեղականների կողմից։
Ի վերջո՝ այս պայմանագիրը միայն կալվածներին չի վերաբերում, այլ հետապնդում է բարձր քաղաքականություն։ Այս համաձայնությունը ծաղրում է միջազգային օրենքը, որովհետև խախտում է այն բոլոր որոշումները, որոնք նպատակադրված են պահպանելու այն status quo-ն, որ կաղապարում է Երուսաղեմի քաղաքը։ Այս միջազգային պայմանագրերը պաշտպանում են Հայոց եկեղեցու և Հայկական համայնքի իրավուքները։
Կարևոր հարցերը, որ պետք է ուղղվեն Նուրհան Պատրիարքին, հետևյալն են՝ ինչո՞ւ այս հողատարածքը վարձակալության տրվեց և որ վերջապես այս անօրինական պայմանագիրը պետք է չեղարկվի, ներկայացվի և պարզվի հայ հասարակությանը»: