Ադրբեջանի պաշտպանության նախարար Հասանովը անցկացրել է ծառայողական խորհրդակցություն, որի ընթացքում մասնակիցներին է ներկայացրել Ալիևի առաջադրանքները: Ըստ տեղեկության, խորհրդակցությանը վերլուծվել է Հայաստանի և Ադրբեջանի սահմանին տիրող իրավիճակը: Ըստ ամենայնի, Հասանովի անցկացրած ծառայողական խորհրդակցության բուն թեման եղել է Սոթքի ադրբեջանական սադրանքն ու դրան հաջորդած մարտական գործողությունները, որոնց հետևանքով, ըստ տարածված ոչ պաշտոնական տեղեկությունների, հայկական զինուժը բավականին կոշտ ու ցավոտ հակահարված է տվել Ադրբեջանի ստորաբաժանումներին:
Սահմանային իրավիճակի «վերլուծում» ձևակերպումը թերևս խոսում է այն մասին, որ տեղեկությունները համապատասխանում են իրականությանը և, եթե Ադրբեջանը խոսեր բաց տեքստով, ապա պարզապես կհայտնեին, որ «վերլուծել են սխալները»: Սա մի կողմից իհարկե գոհացնում է հայկական զինուժի գործողությունների առումով, մյուս կողմից թերևս պահանջում է զինուժի զգոնությունը, քանի որ ըստ ամենայնի հասանովյան խորհրդակցությունը ոչ միայն «սխալների վերլուծություն» է, այլ դրանք «ուղղելու» առաջադրանք: Սոթքում փաստացի տապալված սադրանքն ու գործողությունը մնացել է Ադրբեջանի «կոկորդին» և մեծ հավանականությամբ, Իլհամ Ալիևի «առաջադրանքների» հանգամանքը, որ նշվում է հաղորդագրությունում, ենթադրում է նոր սադրանքի նախապատրաստում և իրականացում՝ «վերլուծելով» նախորդի տապալման պատճառները: Ընդ որում, հասանովյան խորհրդակցությունը ուշադրության է արժանի ոչ միայն այդ առումով, այլ նաև նրանով, որ Ադրբեջանի պաշտպանության նախարարը օրեր առաջ այցելել էր Թուրքիա, որտեղ հետևել էր թուրք-ադրբեջանական վարժանքներին:
Չի բացառվում, որ խորհրդակցությանը քննարկվել են ոչ միայն Ալիևի, այլ պայմանական իմաստով նաև Էրդողանի «առաջադրանքները»: Ինչպես առիթ եմ ունեցել ասելու, Բաքվի սադրանքները ներկայիս փուլում կարող են պահանջված լինել նաև Էրդողանի նախընտրական խնդիրների համատեքստում: Նա ինչպես հայտնի է չկարողացավ ապահովել իր հաղթանակն առաջին փուլով: Երկրորդ փուլի մարտահրավերը Էրդողանի համար կարող է լինել ավելի բարդ, և նա կարող է «օգնության» կանչել Ալիևին: Պետք չէ բացառել, որ Երևանը նաև այդ առնչությամբ հնարավոր մարտահրավերների չեզոքացման հարց էր փորձում լուծել Բրյուսելում, ձգտելով իրավիճակը կայուն կառավարելի պահել մինչև հունիս, երբ կմոտենա Քիշնևի հնգակողմ հանդիպումը և մինչ այդ առավել պարզ կլինի Թուրքիայի նախագահի ընտրության հետ կապված պատկերը, որի երկրորդ փուլը նախատեսված է մայիսի 28-ին:
