Շվեդ սաքսաֆոնահար Ֆին Մարտինը մահացել է` ընկնելով 20 մետր բարձրությունից, երբ ելույթ էր ունենում ուրբաթ օրը Լայպցիգում տեղի ունեցող փողոցային փառատոնի ժամանակ: Այս մասին հայտնում է շվեդական The Local-ը:
Ելույթի ժամանակ կտրվել է ամրալարը, որի վրայով երաժիշտն իջնում էր շինության առաջնամասով և միաժամանակ նվագում: Հարվածից նա տեղում մահացել է: Համարը, որը երաժիշտն անվանել էր «Գլխապտույտ», նա առաջին անգամ չէր կատարում:
Ոստիկանության հաղորդագրության համաձայն` քննություն է անցկացվում: Հնարավոր է, որ միջոցառման կազմակերպիչները եղել են ալկոհոլի ազդեցության տակ:
«Նա համաշխարհային մակարդակի երաժիշտ էր, աշխարհի 10 լավագուն սաքսաֆոնահարներից էր, սակայն նրան Շվեդիայում համարյա չէին ճանաչում»,- ասել է զոհվածի հարազատ Փիթեր Մարտինը:
Նրա խոսքերով, համարն օգնում էր երաժիշտին երաժշտական նախագծեր ֆինանսավորել Արևմտյան Աֆրիկայում: «Աֆրիկական երաժշտությունը նրա կիրքն էր»,- ասել է Փիթերը:
