Ադրբեջանն ու Հայաստանը ավելի քան 30 տարվա հակամարտությունից հետո խաղաղություն և անվտանգություն ապահովելու պատմական հնարավորություն են ստացել: Այս մասին հայտարարել է ԱՄՆ պետքարտուղարի Եվրոպայի և Եվրասիայի հարցերով օգնական Քերըն Դոնֆրիդը՝ ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովում լսումների ժամանակ։
«Սեպտեմբերյան բախումից հետո Ադրբեջանն ու Հայաստանը կրկին կենտրոնացել են խաղաղ գործընթացի վրա, մասնավորապես, նրանք սկսել են ուղղակիորեն աշխատել այս նախագծի վրա, ինչը պատմական քայլ է: ԱՄՆ-ի մասնակցությունն այս գործընթացին նույնպես եզակի է», – ասել է նա։
Նրա խոսքով՝ պետքարտուղար Բլինքենը բազմիցս կապ է հաստատել Ադրբեջանի և Հայաստանի ղեկավարության հետ և կազմակերպել այս երկրների արտգործնախարարների հանդիպումը։
«Պաշտպանության փոխնախարարը զրուցել է երկու երկրների պաշտպանության նախարարների հետ, ազգային անվտանգության հարցերով խորհրդական Ջեյք Սալիվանը Վաշինգտոնում հանդիպել է այդ երկրների գործընկերների հետ: Այս ամենը ևս մեկ անգամ ցույց է տալիս խաղաղություն ապահովելու ԱՄՆ վարչակազմի հանձնառությունը»,- նշել է Դոնֆրիդը։
Դոնֆրիդը հավելել է, որ ԱՄՆ-ն խրախուսում է Ադրբեջանին և Հայաստանին պահպանել բանակցությունները շարունակելու այս հնարավորությունը։
«Մենք դա անում ենք երկկողմ, եռակողմ ձևաչափով և սերտ համակարգելով ԵՄ-ի և այլ գործընկերների հետ»,- ընդգծել է նա։
Դոնֆրիդը հիշեցրել է, որ ԱՄՆ Պետդեպարտամենտի Կովկասի բանակցությունների գծով գլխավոր խորհրդական Ֆիլիպ Ռիքերը վերջերս է վերադարձել տարածաշրջանից։
«Ադրբեջանի և Հայաստանի միջև խաղաղությանն աջակցելը ճիշտ քայլ է և բխում է մեր ազգային անվտանգության շահերից։ Ադրբեջանի և Հայաստանի միջև խաղաղության վերականգնումից հետո մեր համագործակցությունն է՛լ ավելի նշանակալից կդառնա»,- ասել է Դոնֆրիդը։
Նա հավելել է, որ Հարավային Կովկասի ժողովուրդները խաղաղ ապրելու իրավունք ունեն։
«Սա թույլ կտա ողջ տարածաշրջանին բարգավաճել և զարգանալ: ԱՄՆ-ի ներկայիս վարչակազմը հավատարիմ է մնում այս արժեքավոր նպատակին աջակցելուն»,- ասել է Դոնֆրիդը:
Նա նաև հայտարարել է, որ ԱՄՆ-ն ճանաչում է Ռուսաստանի դերն ու ազդեցությունը Հարավային Կովկասում՝ ընդգծելով, որ ռուս պաշտոնյաները պարբերաբար հանդիպում են հայ և ադրբեջանցի գործընկերների հետ։