Նոր ուսումնական տարին կազմ ու պատրաստ սկսելուն, ոլորտում առկա խնդիրները քննարկելուն և լուծման ուղիներ գտնելուն առնչվող հարցեր են քննարկվել հանրակրթական դպրոցների օգոստոսյան ավանդական խորհրդակցության ժամանակ, որին ներկա էին Երևանի քաղաքապետ Կարեն Կարապետյանը, ՀՀ ԿԳ նախարար Արմեն Աշոտյանը, մայրաքաղաքի հանրակրթական դպրոցների տնօրեններ:
Հանդիպման ընթացքում Երևանի քաղաքապետարանի կրթության վարչության պետը ներկայացրել է 2010-2011թթ.-ի ուսումնական տարվա կատարած աշխատանքների հաշվետվությունը՝ ընդհանուր գծերով առանձնացնելով արձանագրված ձեռքբերումները, ինչպես նաև ոլորտում առկա որոշ խնդիրներ:
Հիմք ընդունելով ՀՀ կրթության զարգացման 2011-2015թթ.-ի պետական ծրագիրը, Երևանի քաղաքապետի հանձնարարությամբ ստեղծվել է Երևան քաղաքի հանրակրթության զարգացման ծրագիր, որը դարձել է մայրաքաղաքի դպրոցների աշխատանքային ուղեցույցը:
Կարևորելով կրթության դերը, Կարեն Կարապետյանն ընդգծել է, որ կիրթ հասարակությունը պետության զարգացման ամենակարևոր նախապայմաններից է. «Կրթված հասարակության ձևավորման ու արդարացի և բարենպաստ բիզնես միջավայրի առկայության դեպքում է, որ երկիրը լավ ապագա կարող է ունենալ: Այն երկրներն են հաջողակ, որտեղ այդ երկու գործոնները կատարված են: Այդ իսկ պատճառով մենք պետք է գիտակցենք, թե ինչ մեծ պատասխանատվություն ունենք: Երեխան առաջին անգամ շփվում է արտաքին աշխարհի հետ մանկապարտեզից, դպրոցից: Առավելագույն ուշադրություն լավ սովորող երեխային, նրանց պետք է շահագրգռել: Դրամահավաքը պետք է լինի ոչ թե դրամահավաք, այլ կամավոր բարեգործություն. մենք դպրոցում պետք է փորձենք այս միջավայրը ստեղծել»,-ընդգծել է քաղաքապետը:
Անդրադառնալով դպրոց հաճախող սոցիալապես անապահով ընտանիքների երեխաներին, Կարեն Կարապետյանն ընդգծել է, որ նրանց խնդիրները պետք է հատուկ և մշտական ուշադրության կենտրոնում լինեն. «Մենք պատրաստ ենք քաղաքապետարանի բյուջեից տրամադրել լրացուցիչ միջոցներ, որպեսզի սոցիալապես անապահով երեխան կրթություն ստանալու որևէ խոչընդոտ չունենա»,-շեշտել է քաղաքապետը:
Երևանի քաղաքապետի հանձնարարությամբ բոլոր վարչական շրջաններում սոցիալապես անապահով ընտանիքների երեխաներին կտրամադրվեն գրենական պիտույքներ և անհրաժեշտ այլ պարագաներ:
«Աշակերտ-մշակութային օջախներ կապն ամրապնդելու նպատակով մայրաքաղաքի դպրոցներում ներդրված աբոնեմենտային համակարգը շարունակական է լինելու և այս տարի կհամալրվի նաև ուսումնադաստիարակչական, թեմատիկ կինոդիտումներով»,- վստահեցրել է քաղաքապետը:
Նշելով, որ «Օգնիր Դպրոցիդ» կայքի գործարկումը արդեն տալիս է իր դրական արդյունքները, Կարեն Կարապետյանը կարևորել է համակարգի ճիշտ քարոզումն ու տարածումը:
Դպրոցների հաշվետվության համակարգ, թափանցելիություն, ինտերնետ կապ, ծնողի առավելագույն մասնակցություն, դպրոցների բարեկարգում և այլն. սրանք մեր կրթական համակարգի այսօրվա առաջնահերթություններն են և հրատապ լուծումներ են պահանջում:
ՀՀ ԿԳ նախարար Արմեն Աշոտյանը բարձր է գնահատել քաղաքապետարանի հետ նախարարության համագործակցությունը և ընդգծել, որ կրթության ոլորտում հաջողության հասնելու լավագույն գրավականներից մեկը ջանքերի համատեղումն է:
Հանդիպման ավարտին Երևանի քաղաքապետն ու ԿԳ նախարարը պատասխանել են մասնակիցների հարցերին:
