Ռազմական գործողություններից առաջ Մարիուպոլի բնակչությունը կազմել է կես մլն։ Պատերազմական գործողությունների հետևանքով քաղաքը գրեթե ամբողջությամբ տարհանվեց. այս մասին Radar Armenia-ի հետ զրույցում ասաց Սփյուռքի գործերի գլխավոր հանձնակատարի գրասենյակի Սփյուռքի ներուժի քարտեզագրման և ներգրավման վարչության Ներուժի ներգրավման բաժնի պետ Ամալյա Կարապետյանը։
Նրա խոսքով՝ հաստատված տվյալներ չկան, թե Մարիուպոլում քանի հայ է գտնվում. «Այս պահի դրությամբ ասել, թե քաղաքում որքան հայ բնակչություն կա, շատ դժվար է, որովհետև ներկայումս նաև համայնքում գործող որևէ հայկական կառույց չկա, որը մեր գրասենյակի համար կարող է լինել տեղեկատվության փոխանցման վստահելի աղբյուր»։
Փոխարենը Կարապետյանը վստահեցրեց, որ Մարիուպոլ քաղաքը գրեթե ամբողջությամբ գտնվում է ռուսական վերահսկողության ներքո. «Քաղաքը քիչ-քիչ վերադառնում է բնականոն կյանքին. վերաբացվում են դպրոցները, մանկապարտեզները, բնակչության մի մասը ետ է վերադառնում իրենց տներ։ Չենք բացառում, որ այդ բնակչության մեջ կլինեն նաև հայեր»։
Անդրադառնալով «Ազովստալ» գործարանային տարածքին, որտեղ դեռևս ուկրաինական միավորումներ կան, և որը որոշ չափով բնակեցված տարածք է եղել, Սփյուռքի հանձնակատարի գրասենյակի աշխատակիցը նշեց, որ չի կարող ասել՝ այնտեղ գտնվող հայեր կան, թե՝ ոչ։
Ուկրաինայում բնակվող հայերի՝ Հայաստան վերադառնալու մասին Ամալյա Կարապետյանն ասաց. «Կոնկրետ ասել, թե երկրորդ երկրների տարածք անցած հայերից քանիսն են եղել Մարիուպոլից տարհանվածներ՝ շատ դժվար է, բայց կան հայեր, որոնք նախընտրել են համայնքային կամ իրենց միջոցների հաշվին վերադառնալ Հայաստան»։
Ամալյա Կարապետյանը նաև խորհուրդ տվեց մեր այն հայրենակիցներին, որոնք միտք ունեն մոտ ապագայում կարճաժամկետ կամ երկարաժամկետ կտրվածքով գալ Հայաստան, կապվել իրենց գրասենյակի հետ. «Մենք կդիտարկենք բոլոր հնարավոր տարբերակները, թե ինչպես կարող ենք իրենց աջակցել»։
