Արցախի նախագահ Արայիկ Հարությունյանը վերահաստատում է` ընտրել են խաղաղության օրակարգը: Միաժամանակ նա շեշտում է` «արցախահայության ինքնորոշման իրավունքի լիարժեք ճանաչումը որևէ վերապահման ու զիջման ենթակա չէ, և այդ հարցի բացառիկ տերը հենց արցախահայությունն է»:
Դատախազության և քննչական կոմիտեի պատասխանատուների հետ հանդիպմանն Արայիկ Հարությունյանը շեշտել է` Արցախի իշխանություններն ամբողջությամբ հավատարիմ են մնում այն որդեգրած սկզբունքներին, որոնց հիման վրա անցած 30 տարում պետականություն է կառուցվել, հաղորդում են նախագահի աշխատակազմից:
Անդրադառնալով ներքին և արտաքին մարտահրավերներին՝ Արայիկ Հարությունյանն ընդգծել է, որ անկախ բոլոր տեսակի շահարկումներից՝ Արցախի իշխանությունների համար գերակա է մնում Արցախի ժողովրդի խաղաղ ու արժանապատիվ կյանքի իրավունքի իրացումն ու պաշտպանությունը սեփական հայրենիքում:
Արցախցի իրավապաշտպան, «Հելսինկյան 92» նախաձեռնության արցախյան կոմիտեի համակարգող, արցախի իրավապաշտպան Կարեն Օհանջանյանն «Առաջին լրատվական»-ի հետ զրույցում նշեց՝ Արցախի ժողովուրդն ընտրել է անկախության ուղին, որը երկու անգամ արտահայտվել է ժողովրդի կամքով 1991 թվականի հանրաքվեի ժամանակ և Արցախի սահմանադրության հարցում․ «Արցախի նախագահ Արայիկ Հարությունյանը վերջերս իր ելույթում հայտարարեց մի փաստ, որը վերանայման ենթակա չէ՝ անկախ արտաքին մարտահրավերներից և Ադրբեջանի կողմից մեր սահմանադրական տարածքների մի մասի բռնազավթումից։ Լեռնային Ղարաբաղում ոչ ոք կասկածի տակ չի դնում մեր ժողովրդի ընտրությունը, և Արցախի նախագահը, որպես մեր ժողովրդի կամքի և իղձերի արտահայտող, ևս մեկ անգամ հաստատեց, որ դեպի անկախություն ուղին անսասան է, և ոչ ոք իրավունք չունի արհամարհելու ողջ ժողովրդի կամքը»,- նշեց նա։
Ինչ վերաբերում է հարցին՝ Ադրբեջանի ագրեսիվ քաղաքականության պայմաններում հնարավո՞ր է առանց ռազմական առճակատման նման ինքնուրույն կուրս վարել, Օհանջանյանը պատասխանեց․ «Մենք՝ որպես պետականության կրող ժողովուրդ, հաշվի ենք առնում մեր անկախ կուրսի բոլոր ռիսկերը. , և անում ենք հնարավորը ռազմական առճակատման հերթական փուլը կանխելու համար: Բայց եթե, Աստված մի արասցե, մեր հակառակորդը մտադիր է նորից պատերազմ սկսել, ապա մենք՝ հաշվի առնելով 2020 թվականի պատերազմի տխուր փորձը, երբ Ռուսաստանը մեզ պարզապես հանձնեց Ադրբեջանին՝ հանուն իր աշխարհաքաղաքական շահերի, այդ թվում՝ հնարավոր սցենարների. որոնք այժմ ծավալվում են Ուկրաինայում, որպես մեկ ընդհանրություն, տեր ենք կանգնելու մեր հայրենիքի պաշտպանությանը և վերադարձնելու հայի կորցրած արժանապատվությունը»։
Ըստ Օհանջանյանի՝ Արցախում ռազմական գործողությունների սկիզբը չափազանց անցանկալի փաստ է Ռուսաստանի և, տարօրինակ կերպով, նաև Արևմուտքի շահերի համար «Ուստի ավելի քան վստահ եմ, որ Արցախի անկախ պետության կառուցումը շարունակելու ուղղությունը կշարունակվի, և Ադրբեջանը զերծ կմնա լուրջ ռազմական սադրանքներից, որոնք կարող են արժենալ վերջին պատերազմի ժամանակ ձեռք բերված տարածքների կորուստը»։
