Ֆինլանդիայում ՆԱՏՕ-ին անդամակցության կողմնակիցների թիվն աճել է՝ կազմելով բնակչության 65%-ը։ Այս մասին հայտնում է Интерфакс-ը՝ հղում անելով Helsingin Sanomat-ի և Kantar TNS-ի անցկացրած հարցման տվյալներին։ Հետազոտությունն իրականացվել է Gallup Forum ինտերնետային հարթակում՝ 2022թ․ ապրիլի 22-27-ը՝ 1062 հոգու շրջանում: Հարցման արդյունքների սխալանքը կազմում է մոտ 3 տոկոսային կետ։
Հարցվածների 13%-ը դեմ է արտահայտվել Ֆինլանդիայի՝ դաշինքին միանալուն, 22%-ը դեռ չի կողմնորոշվել։ HS-ի կողմից ապրիլի սկզբին անցկացված նախորդ հարցման ժամանակ 59%-ը կողմ էր Ֆինլանդիայի անդամակցությանը ՆԱՏՕ-ին, մինչդեռ 17%-ը՝ դեմ էր դրան: Փետրվարի 23-25-ը «Taloustutkimus»-ի կողմից, Yle մեդիա-կորպորացիայի պատվերով, անցկացված հարցումը ցույց է տվել, որ ֆինների 53%-ն այն ժամանակ կողմ էր ՆԱՏՕ-ին անդամակցելուն, իսկ 28%-ը՝ դեմ:
Տղամարդկանց շրջանում հարցվածների 70%-ը կողմ է ՆԱՏՕ-ին, իսկ կանանց՝ մոտ 59%-ը։ ՆԱՏՕ-ին անդամակցելու գաղափարին ամենաշատն աջակցում են տարեցները, ամենաքիչը՝ երիտասարդները: Այնուամենայնիվ, մինչև 30 տարեկանների կեսից ավելին կողմ է ՆԱՏՕ-ին միանալուն: Ֆինլանդիայի՝ ՆԱՏՕ-ին անդամակցելու հարցը այժմ քննարկվում է երկրի խորհրդարանի կողմից։ Սպասվում է, որ դիմում ներկայացնելու որոշումը կկայացվի մայիսին։