ԵՊՀ եվրոպական ուսումնասիրությունների կենտրոնի փորձագետները ներկայացրեցին իրենց կողմից իրականացված նոր հետազոտությունը՝ Եվրասիական տնտեսական միության (ԵԱՏՄ) անդամ երկրների քաղաքական կայունության մարտահրավերներին վերաբերող աշխատությունը:
Եվրոպական ուսումնասիրությունների կենտրոնի տնօրեն Վլադիմիր Մարտիրոսյանը իր ողջույնի խոսքում նշեց, որ «ԵԱՏՄ երկրների քաղաքական կայունության մարտահրավերները. քաղաքական գործոնների ինդեքսը» խորագրով միջգիտակարգային հետազոտությունը արդեն իսկ դրական արձագանք է ստացել մասնագետների և ուսանողների շրջանում:
Գրքի համահեղինակ, Եվրոպական ուսումնասիրությունների կենտրոնի հետազոտական խմբի ղեկավար Արուսյակ Ալեքսանյանի խոսքով՝ աշխատությունը տպագրվել է 2021 թ., սակայն կորոնավիրուսի համավարակի սահմանափակումների պատճառով միայն այժմ է հնարավորություն ստեղծվել հանձնելու այն ընթերցողների դատին:
Ներկայացվող հետազոտության մեջ վերլուծված են Եվրասիական տնտեսական միության կայունության և եվրասիական ինտեգրման ընթացակարգերը: Քաղաքական համակարգի կայունության ինդեքսի մեթոդաբանության միջոցով համեմատական վերլուծության են ենթարկված ԵԱՏՄ անդամ պետությունների քաղաքական կայունության և ինտեգրման նոր օրակարգի քաղաքական գործոնները:
Աշխատությունն ընդգրկում է նաև ԵԱՏՄ անդամ պետությունների քաղաքական կայունությունը պայմանավորող մի շարք գործոնների համակողմանի ուսումնասիրությունները 2000-2019 թվականներին: Քաղաքական համակարգի կայունության ինդեքսի մեթոդաբանության շրջանակում կատարվել են ներերկրային և միջերկրային վերլուծություններ: