ՀՀ ազգային ժողովի «Հայաստան» խմբակցության՝ ազգությամբ ասորի պատգամավոր Զեմֆիրա Միրզոևան խորհրդարանի ամբիոնից բարձրացրեց Թուրքիայում ազգային փոքրամասնությունների թիրախավորման հարցը: Զեմֆիրա Միրզոևան հարցին անդրադարձավ ԱԺ մարտի 22-ի նիստում հայտարարությունների ժամին:
«Թուրքիայի ազգային փոքրամասնությունները շարունակվում են թիրախավորվել: 2020-ի հունվարին ասորական եկեղեցու հոգևորականի ծնողները Թուրքիայում առևանգվել են անհայտ զինված խմբի կողմից: Ավելի ուշ հայտնաբերվեց նրանցից մեկի դին: Սակայն մինչև օրս այդ զարհուրելի դեպքը բացահայտված չէ»,-ասաց պատգամավորը՝ իր աջակցությունը հայտնելով ասորի հոգևորականի ընտանիքին, Թուրքիայի ասորական համայնքին:
Պատգամավորը նկատեց՝ առաջին հայացքից կարող է թվալ, թե ինքը խոսում է խիստ մասնավոր դեպքի մասին, սակայն, իրականում սա Թուրքիայի դարավոր ձեռագիրն է: «Թուրքիան հարմար պահը բաց չի թողնում երկրի ներսում ազգային փոքրամասնությունների հանդեպ հաշվեհարդար տեսնելու համար: Հայ և ասորի ժողովուրդները քաջ ծանոթ են այս ցեղասպան և ոճրագործ ձեռագրին»,-ասաց Միրզոևան:
Նա թուրքական այս ձեռագրի ամենավառ դրսևորումներից համարեց նաև քուրդ ազգաբնակչության դեմ շարունակաբար իրականացվող պատժիչ գործողությունները: Պատգամավորը ընդգծեց, որ Անկարայի թիրախում են նաև Սիրիայի, Իրաքի ասորիները, քրդերը և եզդիները: Նա հիշեցրեց, որ Թուրքիան, հավատարիմ մնալով իր ձեռագրին, 2020-ին արդեն Ադրբեջանին օժանդակելով էր փորձում ավարտին հասցնել 1915-ի մեծ ոճիրը:
