Մի քանի հարյուր ցուցարարներ չորեքշաբթի օրը նոյեմբերի 3-ին արգելափակել էին երթևեկությունը Ուկրաինայի մայրաքաղաք Կիևի կենտրոնում՝ ի նշան բողոքի կորոնավիրուսի սահմանափակումների և պարտադիր պատվաստումների դեմ
Կառավարությունը ներկայացրել է նոր սահմանափակումները՝ համավարակին դիմակայելու համար։ Ուկրաինան վերջին շաբաթներին գրանցել է կորոնավիրուսի նոր դեպքերի և մահերի հակառեկորդային բարձր ցուցանիշներ, իսկ վարակվածների ընդհանուր թիվը հասել է գրեթե 3 միլիոնի՝ ավելի քան 69 հազար մահվան դեպքերով։
Պատվաստումները պարտադիր են դարձել պետական որոշ աշխատողների համար, իսկ «կարմիր» գոտու տարածքներում, որը ներառում է նաև Կիևը, ռեստորաններից, մարզասրահներից և հասարակական տրանսպորտից կարող են օգտվել միայն պատվաստված կամ COVID-ի բացասական թեստ ունեցող անձինք:
Ցուցարարները բարձրացրել էին պաստառներ «Ոչ՝ COVID-ի անձնագրերին», «Պաշտպանե՛նք մեր երեխաներին» և «Ոչ՝ COVID-ի ցեղասպանությանը»։
Ուկրաինան այս տարի հետ է մնացել եվրոպական մյուս երկրներից՝ կորոնավիրուսի դեմ պատվաստանյութեր ձեռք բերելու հարցում և այժմ պայքարում է թերահավատ հասարակության դեմ՝ դրանք ընդունելու համար:
«Հավատացեք՝ այս հակապատվաստման տրամադրությունները արագորեն վերանում են վերակենդանացման բաժանմունքներում, իսկ կեղծ վկայականներն այնտեղ չեն գործում»,- ասում է Ուկրաինայի առողջապահության նախարար Վիկտոր Լյաշկոն հեռուստատեսային ասուլիսի ընթացքում։
Երեքշաբթի օրը խորհրդարանը քրեականացրեց կեղծ COVID-19 պատվաստանյութերի վկայականների օգտագործումն ու արտադրությունը՝ սահմանելով մինչև երեք տարվա ազատազրկում կամ մոտ 6,460 դոլարի տուգանք իրավախախումների դեպքում:
