ԱՄՆ նախկին նախագահ Դոնալդ Թրամփը կարծում է, որ Աֆղանստանից ամերիկյան զորքերի դուրսբերման օպերացիան դարձել է ամենամեծ նվաստացումն ԱՄՆ-ի համար։ Fox News-ի եթերում նա հայտարարել է, որ Ամերիկայի համար «սարսափելի ժամանակներ» են եկել։
«Չգիտեմ՝ դա ռազմական թե հոգեբանական պարտություն է, բայց նման բան նախկինում չի եղել։ Պարզապես անհնար է հավատալ»,-ասել է Սպիտակ տան նախկին ղեկավարը։
Թրամփն Աֆղանստանից զորքերի դուրսբերման փաստն անվանել է հրաշալի, սակայն ընդգծել, որ նախկինում ոչ ոք չի իրականացրել զորքերի դուրսբերման գործընթաց ավելի վատ, քան Ջո Բայդենը։
Նրա խոսքով՝ այս իրավիճակը տասնամյակներ շարունակ կազդի ԱՄՆ-ի միջազգային հարաբերությունների վրա։ Թրամփը խոստացել է 2024 թվականի ընտրություններին ուրախացնել ամերիկացիներին, սակայն մանրամասներ չի հայտնել։
Բայդենի վարչակազմը քննադատության է արժանացել նաև ԱՄՆ նախկին փոխնախագահ Մայք Փենսի կողմից, ով բնութագրել է Աֆղանստանից ամերիկացիների դուրս գալը որպես վերջին 40 տարում միջազգային հարթակում Վաշինգտոնի մեծագույն նվաստացում, գրում է The Wall Street Journal-ը։
