Այս փոփոխությունները, ցավոք, որևէ լուրջ կամ կոնցեպտուալ փոփոխություններ չեն բերի մեր բանակում, որովհետև բանակը հասարակության օրգանական մասն է, և հասարակության բոլոր խնդիրները արտացոլվում են բանակում։ Այդ մասին «Առաջին լրատվական»-ի հետ զրույցում ասաց ռազմական փորձագետ Մհեր Հակոբյանը՝ անդրադառնալով պաշտպանության նախարարի փոփոխությանը. «Հասարակությունն այս պահին ունի բազմաթիվ խնդիրներ՝ սոցիալական, հոգեբանական, մշակութային, կրթական, տնտեսական և այլն, և այս պայմաններում «հրաշք» կադրերի նշանակումով ունենալ բանակում որակական փոփոխություն, այդ հարցում թերահավատ եմ, մանավանդ որ իշխանությունների նշանակումները թիթեռնի կյանք են ունենում։ Եվ հիմա ի՞նչ վստահություն, որ պաշտպանություն նախարար նշանակելուց կարճ ժամանակ անց նրան չեն հանի։ Ես կարծում եմ, որ պետք է համակարգային մոտեցում լինի, երկրի վիճակը պետք է լավանա, նոր բանակում լինեն դրական փոփոխություններ»,-ասաց Հակոբյանը։
Հիշեցնենք, որ Արշակ Կարապետյանը նշանակվել է պաշտպանության նախարարի առաջին տեղակալ։
Մհեր Հակոբյանը նշեց, որ Արցախյան երկրորդ պատերազմից հետո Արշակ Կարապետյանի գործունեությունը որոշակիորեն թերի համարվեց, և նրան ազատեցին պաշտոնից, 2018-ի հայտնի իրադարձություններից հետո Արշակ Կարապետյանն անցավ իշխանությունների կողմը և որոշակի դերակատարություն ունեցավ ապրիլյան քննիչ հանձնաժողովի գործունեության հետ կապված. «Թեև ապրիլյան հանձնաժողովի բովանդակությունը արժեզրկվել է և՛ քաղաքական, և՛ բովանդակային իմաստով»,-ասաց նա։
Հակոբյանը նշեց, որ Արշակ Կարապետյանն «աճել» է Սերժ Սարգսյանի օրոք, ամեն դեպքում կադրային զինվորական է, որը տասնամյակներ բանակի ներսում է.«Իմ կարծիքով՝ ավելի լավ է նրա նշանակումը, քան 2000 թվականից հետո բանակաշինությունից հեռու մնացած անձը՝ նախկին նախարարը, բայց մեկ կադրային նշանակումով հեղափոխական թռիչքային փոփոխություններ սպասել, ճիշտ չէ, հաջողությունը լինում է միայն նպատակաուղղված, ճիշտ և տարիների տքնաջան աշխատանքի արդյունքում»։
Անդրադառնալով այն դիտարկմանը, որ մեր բանակը Երասխում անակնկալի է բերել ադրբեջանական բանակին՝ Հակոբյանը նշեց, որ չի կարծում, թե հայկական բանակն անակնկալի է բերել, ավելի շուտ՝ ուժերի փորձարկման էպիզոդ էր. «Պետք է հետևողական և ճիշտ համակարգված աշխատանք իրականացնել, որպեսզի բանակում տարիներ հետո դու արդյունք ունենաս»,-նշեց փորձագետը։
