Օրերս ԲԴԽ լիազորությունները կասեցված նախագահ Ռուբեն Վարդազարյանը հայտարարեց, որ դատարանը վարույթն իրականացնող մարմնին պարտավորեցրել է վերացնել իր՝ որպես դատավորի և ԲԴԽ նախագահի իրավունքների և օրինական շահերի խախտումները:
Այլ կերպ ասած՝ Վարդազարյանը պնդում է, որ պետք է վերականգնվի իր պաշտոնում:
«Առաջին լրատվական»-ին, մինչդեռ, մի շարք կարևոր հանգամանքներ են հայտնի դարձել Վարդազարյանի և նրան «արդարացրած» դատավորի՝ որոշման կայացման խախտումների վերաբերյալ:
Եւ այսպես՝ պարզվում է, որ Վարդազարյանը ժամանակին բավարարել է դատավոր Դավիթ Հարությունյանի հեռախոսային խոսակցությունները գաղտնալսելու միջնորդությունը (ինչի իրավունքը Ռ.Վարդազարյանը չուներ, քանի որ այս հեռախոսային խոսակցությունների գաղտնալսումը քրեական հետապնդում է իրենից ներկայացնում, հետևաբար՝ կարող էր տեղի ունենալ միայն դատավոր Դ.Հարությունյանի նկատմամբ Գլխավոր դատախազի համապատասխան որոշման պայմաններում, որը նույնպես առկա չի եղել):
Չնայած այս հանգամանքը կողմերին հայտնի է եղել, և այս հիմքով դատավորին ինքնաբացարկի միջնորդություն է ներկայացվել, այնուամենայնիվ, դատավորը ինքնաբացարկ չի հայտնել և շարունակել է բողոքի քննությունը:
Սա դեռ ամենը չէ՝ դատավորը, պարզվում է, իրավունք չուներ այս բողոքը քննել նաև մեկ այլ պատճառով՝ քանի որ ՀՀ քրեական դատավարության օրենսգիրքը չի նախատեսում անձին որպես մեղադրյալ ներգրավելու մասին որոշումների դատական բողոքարկման հնարավորություն և սահմանում է, որ մինչդատական վարույթի մարմինների որոշումները դատարանին են բողոքարկվում ՀՀ քրեական դատավարության օրենսգրքով սահմանված դեպքերում և կարգով:
Այսպիսով ստացվում է, որ Հարությունյանը խախտել է օրենքը վարույթ ընդունելով Ռ.Վարդազարյանին որպես մեղադրյալ ներգրավելու մասին ՀՀ Գլխավոր դատախազ Ա.Դավթյանի որոշման դեմ բերված բողոքը և խախտել է դատավորի վարքագծի կանոնը:
Ինչ հետևանքներ կարող է ունենալ սա՝ ցույց կտա ժամանակը:
Լուսանկարը՝ panorama.am-ի
