«Հայաստան» դաշինքը պետք է 180 աստիճանով փոխի իր ռազմավարությունը։ Թե հիմա ինչ պետք է անի՝ ինքը պետք է որոշի»,-«Առաջին լրատվական»-ի հետ զրույցում նման տեսակետ հայտնեց քաղտեխնոլոգ Արմեն Բադալյանը։
Մեր զրուցակցի դիտարկմամբ՝իշխող ուժն ապագայի օրակարգ չունի, որպես դրական ցուցիչ ներկայացրել է ասֆալտապատման աշխատանքը, բայց դա հավերժ լինել չի կարող․ «Անընդհատ նախկիններին քննադատելն էլ չի լցնելու ՔՊ-ի ընտրողների «ստամոքսը»։ Դա ՔՊ-ի թույլ կողմն է և ենթադրում եմ, որ «Հայաստան» դաշինքը հենց դա է դարձնելու քննարկման առարկա»։
Արմեն Բադալյանի խոսքերով՝ ընտրական գործընթացը Հայաստանում չի ավարտվել․ «Կան նաև ՏԻՄ մարմիններ, դրանք ևս շատ կարևոր են։ Ըստ տարածված խոսակցությունների՝ շատ մեծ է հավանականությունը, որ կարող են տեղի ունենալ Երևանի ավագանու նոր ընտրություններ։ Դա նույնպես աշխատանքի լայն հնարավորություն է ստեղծում։ Գյումրիում, Վանաձորում, խոշոր քաղաքներում ևս ընտրություններ են տեղի ունենալու առաջիկայում, ինչն աշխատանքի մեծ հնարավորություն է ստեղծում։ Այսինքն՝ ինչպես «Հայաստան» դաշինքն է ասել, ինքն օգտվելու է ԱԺ մանդատից հնարավոր բոլոր ճակատներում՝ Հայաստանի ներսում ու դրսում իշխանության դեմ պայքարելու համար»։
Ինչ վերաբերում է «Պատիվ ունեմ» դաշինքին, մեր զրուցակիցն ասաց․ «Այն, որ նախկին նախագահ Սերժ Սարգսյանը նշում է, թե իշխանությունը հաղթեց ընդդիմության սխալների պատճառով, ամենամեծ սխալը հենց ինքը թույլ տվեց, երբ քարոզարշավի ընթացքում ստվերեց «Պատիվ ունեմ» դաշինքի, ԱԱԾ նախկին տնօրենին։ Դրանով նա մեծ սխալ թույլ տվեց ու մեծապես նպաստեց գործող վարչապետի վերարտադրության իր կտրվածքով։ Թե ինչ պետք է անի «Պատիվ ունեմ» դաշինքը, ենթադրում եմ, որ «Հայաստան» դաշինքի ավելի քիչ տարբերակը։ Նրանք ընդամենը 7 մանդատ ունեն, բայց այդ 7 մանդատն էլ կարող են օգտագործել պատգամավորի գործունեությունից բխող ակտիվ քննադատություն իրականացնելու համար։ Կհաջողվի՞ նրանց ՏԻՄ ընտրություններում ունենալ հաջողություններ, նույնպես չի բացառվում, որովհետև ՀՀԿ-ն տարածքային կառույցներ ունի։ Միգուցե այս անգամ դա այնքան էլ չօգնեց, բայց գուցե փորձի այդ ընտրական գործընթացները հօգուտ իրեն հաջողությամբ ծառայեցնել»։
Խոսելով արտախորհրդարանական ուժերի մասին, մեր զրուցակիցը մեջբերեց վարչապետի նախաձեռնությունը՝ ստեղծել աշխատանքային մարմին հետագա համագործակցության մասին․ «Բայց այդ ձևաչափը միշտ հօգուտ վարչապետի է լինելու, որովհետև նրանք դե յուրե լինելով ընդդիմություն դե ֆակտո պրոիշխանական գործունեություն են իրականացնելու։ Մոտավորապես այս գործունեությունն են իրականացնելու՝ մինչև որ լինեն այլ զարգացումներ։ Իշխանության ձեռքին լավ փաստարկ է այն, որ իշխանությունը զարգացման ծրագիր չունի։ Թե ինչքանով կկարողանան օգտագործել դա ՝չեմ կարող ասել, որովհետև նրանք մեծ պոտենցիալ ունեին մեծ տոկոսներ ստանալու, բայց շատ կոպիտ, ռազմավարական սխալներ թույլ տվեց։ Նույն էլ հիմա՝ ունեն պոտենցիալ, բայց կկարողանան, թե ոչ՝ ապագան ցույց կտա»։