«Առաջին լրատվական»-ի զրուցակիցն է Քաղաքականության հետազոտական կենտրոնի փոխնախագահ Արմեն Գրիգորյանը։
-Հայաստանում մեկնարկել է հունիսի 20-ին կայանալիք արտահերթ ընտրությունների քարոզարշավը՝ ընդ որում բավականին լարված մթնոլորտում: Ի՞նչ դիտարկումներ ունեք, կարծում եք ընտրությունները ներքաղաքական ճգնաժամի հաղթահարման ելք կարո՞ղ են լինել:
-Գործող սահմանադրությամբ ամրագրված «կայուն մեծամասնության» դրույթի և ընտրությունների երկրորդ փուլի հնարավորության, նաև բևեռացման չափազանց բարձր աստիճանի պայմաններում անկայունությունը կարող է երկարատև լինել։ Այսպիսի սահմանադրությամբ դժվար չէ պատկերացնել ամենամյա արտահերթ ընտրություններ և շարունակական քաոս։ Մյուս վտանգավոր սցենարն էլ պայմանավորված է իշխանափոխության հույսը ոչ թե ընտրությունների, այլ բախումների հրահրման հետ կապող, ընտրությունների արդյունքների վիճարկումը որպես դրա պատրվակ օգտագործելու ընդունակ ընդդիմության և վերջինիս նկատմամբ լոյալ դատարանների առկայությամբ։
-Իրադարձությունները զարգացան այնպես, որ այս ընտրությունները դարձան երկու բևեռների՝ Քոչարյանի ու Փաշինյանի միջև պայքար: Իհարկե, կան մասնակից շատ այլ ուժեր ևս, բայց շեշտադրումները հիմնականում այս ուղղությամբ են: Ձեր կարծիքով նման մթնոլորտը ի՞նչ վտանգներով է հղի:
-Բարեբախտաբար, վիճակն առայժմ այդ աստիճան ծանր չէ, որ ընտրությունը միայն այդ երկուսի միջև լինի․ այդ երկընտրանքը սակայն հնարավոր երկրորդ փուլի վատագույն սցենարն է։ Այդ դեպքում երկրորդ փուլում առավել մեծ դեր կխաղան փողը և կրիմինալը։
Այժմ դեռևս կա ընտրության թեկուզ փոքր հնարավորություն ռացիոնալ մտածելու ընդունակություն ունեցող ընտրողների համար, ովքեր կարող են դուրս գալ նշված ուժերից մեկին ընտրելու միջոցով մյուսից ընդմիշտ ազատվելու ցանկությամբ գծված շրջանակից։
-Խոշոր քաղաքական ուժերի ղեկավարները մերժեցին բանավեճի առաջարկը: Ռ. Քոչարյանն էլ առաջարկեց բանավեճի փոխարեն դուել անցկացնել: Ինչպե՞ս եք գնահատում նախընտրական նման մթնոլորտը:
Ճշտենք, որ մերժեցին Փաշինյանի առաջարկը։ Մյուս կողմից, Ռ. Քոչարյանը նախկինում էլ իրական բանավեճի երկրպագու չի եղել․ ելույթներ է ունեցել յուրայինների հավաքներում կամ պատասխանել ծառայամիտ «լրագրողների» հարցերին, իսկ ասենք ընտրությունների ընթացքում մրցակիցների հետ բանավիճելուց խուսափում էր, հետագայում էլ հարցերը լուծում էր վարչական և ուժային լծակներով։ Իսկ ընդհանուր մթնոլորտն իհարկե անառողջ է, պարզապես ավելի շատ, քան սովորաբար եղել է նախկին ընտրությունների ժամանակ։
