Նիկոլ Փաշինյանն ԱԽ նիստին հանդես եկավ առաջարկությամբ՝ ուղղված միջազգային հանրությանը և Ադրբեջանին։
«Առաջարկը հետևյալն է. մենք պայմանավորվում ենք, որ շատ արագ երկու կողմերի զինված ուժերի ստորաբաժանումները հայելային եղանակով հեռանում են սահմանից։ Այսինքն՝ սահմանի վերաբերյալ կա պատկերացում՝ 5 կմ այս կողմ, թե այն կողմ, ենթադրաբար, մենք առաջարկում ենք, որ ընդհանրապես այդ տարածքներից ԶՈՒ ստորաբաժանումները վերադառնան մշտական տեղակայման վայրեր։
Դրա փոխարեն սահմանագծի երկայնքով տեղակայվում են միջազգային դիտորդներ՝ Ռուսաստանի կամ ԵԱՀԿ Մինսկի խմբի համանախագահող երկրների ներգրավվածությամբ»,- նշեց Փաշինյանը՝ հավելելով, որ դիտորդների ներկայությունն այդ տարածաշրջանում անհրաժեշտ է, որ համոզված լինեն կողմերը, որ դիմացի կողմը պայմանավորվածությունը կատարում է, զորքեր չի մոտեցնում սահմանագծին։
Փաշինյանը հայտնեց, որ խոսքը Սոթք-Խոզնավար սահմանային հատվածի մասին է, որից հետո միջազգային հովանու ներքո տեղի կունենա սահմանային կետերի ճշգրտման աշխատանք։
