Երեկ առավոտյան Ադրբեջանի զինված ուժերը սադրիչ գործողություններ են իրականացրել և հատել Հայաստանի պետական սահմանը Սև լճի հատվածում։ Կառավարության նիստի մեկնարկին այս մասին ասաց ՀՀ վարչապետի պաշտոնակատար Նիկոլ Փաշինյանը։
Նա նշեց, որ իրավիճակի էական փոփոխություն չկա, և այս պահի դրությամբ իրադրությունը շարունակում է նույնը մնալ. «Դա նշանակում է, որ Սև լճի մերձակայքում կան ադրբեջանցի զինվորներ։ Այնտեղ նաև մեծ թվով մեր զինվորների ներկայություն կա, բայց ուզում եմ ասել, որ իրադրությունը ռազմական էսկալացիայի չի հասել։ Այսինքն փոխհրաձգություն և բախում չկա։ Երեկվանից աշխատանք է տարվում ադրբեջանցի զինվորներին այդ տարածքից դուրս բերելու ուղղությամբ։ Տեղի ունեցածը նախապես ծրագրված սադրանք է եղել, և ադրբեջանցիներն իրենց հետ ունեն ակնհայտ կեղծված քարտեզներ, որով ուզում են հիմնավորել, թե իրենք գտնվում են Ադրբեջանի սահմաններից ներս։ Այդ քարտեզները կեղծված են, ինչը ցույց է տալիս, որ գործ ունենք կազմակերպված սադրանքի հետ»,-նշեց Նիկոլ Փաշինյանը։
