«Առաջին լրատվական»-ի զրուցակիցն է «Ազատամարտիկների դաշինքի» խորհրդի անդամ Ռազմիկ Պետրոսյանը։
– Պարոն Պետրոսյան, «Իմ քայլի» և Նիկոլ Փաշինյանի հանդիպումից պարզ է դարձել, որ արտահերթ ընտրություններ չեն անցկացվի, քանի որ, ըստ նրանց ձևակերպման, հասարակության լայն շերտերում նման պահանջ չկա։ Դուք նախկինում կողմ էիք արտահերթ ընտրությունների անցկացմանը, այս որոշման մասին ի՞նչ եք մտածում։
– Բացասական վերաբերմունք ունեմ։ Այսպիսով ընդդիմությանը հնարավորություն կտրվի «տանջել ժողովրդին» ու տարբեր քայլերի դիմել։ Ես իշխանություններին կոչ կանեի գնալ ընտրության, դա նրանց շատ է պետք։ Եվ պատճառն այն չէ, թե ինչպիսին են նրանց շանսերը, այլ պետք է օր առաջ հաստատվի, որ իրենք ունեն ժողովրդի վստահությունը ու օր առաջ կայունացնեն երկրում իրավիճակը։ Այս մթնոլորտում շարունակելը սխալ է։ Իշխանության համար էլ այս հոգեբանական վիճակում սխալ կլինի։ Ճիշտ կլիներ ընտրություն կազմակերպել՝ ինչքան շուտ, այնքան լավ, որպեսզի կարողանայինք օր առաջ լծվել պետականաշինության, բանակաշինության խնդրին։ Ժամ առաջ պետք է անցկացնել ընտրությունները։ Բոլորս էլ գիտենք, որ այս իշխանություններն ունեն ժողովրդի վստահությունը, իսկ այն ուժերը, որոնք խոսում են այս իշխանությունների դեմ, շանսեր չունեն։
– Ձեր դիտարկմամբ՝ ի՞նչ քայլերի կարող են դիմել այդ ուժերը։ Կարծիք կա, որ չի բացառվում հեղաշրջումը, ֆիզիկական ոչնչացումների սցենարը։ Դուք ունե՞ք այդպիսի մտահոգություն։
– Ամեն խնդիր էլ կարող է լինել, մանավանդ որ մենք գիտենք, թե ում հետ գործ ունենք։ Նրանց համար իշխանություն կորցնելը մահ է։ Իրենք ամեն քայլի էլ կարող են դիմել։ Դրա համար էլ նշում եմ, որ ընտրությունները խիստ անհրաժեշտ են։ Ու դրանով միայն իշխանության մնալ-չմնալու խնդիրը չէ, որ լուծվում է։ Ավելի շատ երկիրը կայունացնելու խնդիր է լուծվում։ Իսկ ռևանշիստները փորձում են երկրի հաշվին իրենց անձնական խնդիրները լուծել։ Նրանք պատրաստ են անգամ իշխանության գալ պետականության կորստի միջոցով։ Տեսեք՝ խոսում են անգամ Ռուսաստանին միանալու, Ռուսաստանի կազմի մեջ մտնելու մասին, միայն թե ստանան այդ «դաբրոն»։ Ուստի ես կարծում եմ՝ նման ուժերը ամեն ինչի էլ պատրաստ են։ Լավագույն տարբերակը ընտրություններն են։ Եվս մեկ անգամ կլռեցվեին բոլոր նրանք, որոնք մտադիր են ռևանշի դիմել ու նման գործողություններ իրականացնել։
– Ինչո՞ւ իշխանությունները հետ կանգնեցին՝ ըստ Ձեզ։
– Ես բացարձակապես չեմ կարողանում արդարացնել այդ որոշումը։ Գուցե կան պատգամավորներ, որոնք գիտեն, որ երկրորդ անգամ շանս չի ընձեռվի հայտնվելու խորհրդարանում։ Ամեն դեպքում գործող իշխանություններին խանգարող բան չկար, հակառակը՝ այս ընտրությունները հենց իրենց էին պետք. կարճ ժամանակահատվածում կկարողանային երկիրը ոտքի հանել։
