Գարնան սկզբում կենսաթոշակների և պետական հատվածում աշխատավարձերի վճարման հետ կապված խնդիրներ չպետք է լինեն։ Այս մասին կառավարության նիստից հետո ասել է ֆինանսների նախարար Ատոմ Ջանջուղազյանը։ Ըստ նրա՝ դա պայմանավորված է նրանքով, որ մակրոտնտեսական իրավիճակը կայուն է։ «Սա ոչ միայն մեր, այլ նաև միջազգային ներդրողների գնահատականն է։ Անհասկանալի է, թե ինչի վրա են հիմնված պնդումները այդպիսի ռիսկերի վերաբերյալ»,- հավելել է Ջանջուղազյանը։
Ինչպիսի՞ն ձեր դիտարկումները․ «Առաջին լրատվական»-ի հարցին տնտեսագետ Ատոմ Մարգարյանը պատասխանեց․ «Ռիսկեր, անկասկած, միշտ կան։ Մեր կարգի երկրներում, անկախ ֆորս-մաժորային իրավիճակներից, ռիսկեր միշտ կան, որովհետև, պարզ ասած՝ պարտքով ապրող երկիրը չի կարող ռիսկեր չունենալ։ Եթե պետական բյուջեի դեֆիցիտ համախառն ներքին արդյունք հարաբերակցությունն անցնում է 3 տոկոսից, դա արդեն լուրջ ռիսկ է։ Իսկ այն, ինչ մենք այսօր տեսնում ենք, և այն իրողությունները, որոնք 2020 թվականի համավարակի ու 44-օրյա պատերազմի ֆոնին ստեղծվել էին ու ծախսային ահռելի բեռ էին տնտեսության վրա, և նաև եկամտային մասի զգալի կորուստներ կային։ Այս ամենը, իհարկե, լրացուցիչ ռիսկեր են պարունակում։
Ընդհանուր առմամբ, այո, կան ինդիկատորներ, կան մակրոտնտեսական ցուցիչներ, որոնք կապված են փոխարժեքի հարաբերական կայունության հետ, կապված են արտաքին և ներքին պարտքի սպասարկման կայունության հետ։ Պետական ֆինանսների ոլորտում, թերևս, կարելի է ասել, որ որոշակի հարաբերական կայունություն կա, բայց նույնը չենք կարող ասել մասնավոր հատվածում ներդրումների ներգրավման, աշխատատեղերի ստեղծման և, ըստ էության, բարձր տեխնոլոգիական ոլորտի լճացվածության ֆոնին։ Այնպես որ, դրանք տարբեր բաներ են․ այդ կայունություն ասածը նայած, թե որ տեսանկյունից ենք նայում»։
Մանրամասները՝ տեսանյութում։