Շատ վայրերում հիմա կլիմայի գլոբալ փոփոխության պատճառով ձմեռներն ավելի տաք են լինում, ամառները՝ համեմատաբար շոգ: Բայց վաղուց է արդեն հայտնի, որ տեղի է ունենում կլիմայի փոփոխություն և, ըստ այդմ, քաղաքաշինությունը պետք է ադապտացվի կլիմայի փոփոխությանը, իսկ մեզանում հակառակն է,- «Առաջին լրատվական»-ի հետ զրույցում անդրադառնալով կլիմայի փոփոխություններին ու Երևանում վերջին օրերին տիրող շոգին՝ ասաց «Հանուն կայուն մարդկային զարգացման» ՀԿ նախագահ, բնապահպանության նախկին նախարար Կարինե Դանիելյանը:
Երևանում քաղաքաշինությունը գնում է ոչ թե կլիմայի փոփոխության ադապտացման ուղիով, կարծում է մասնագետը, այլ հակառակը՝ կանաչ տարածքների շատացնելու փոխարեն, մենք դրանք կրճատում ենք:
«Բետոնապատված, ապակեպատված տարածքներն ավելացնում ենք ու խտացնում: Այն ամենը, ինչ արվել է Երևանում քաղաքաշինության առումով, իր էությամբ բացարձակ հակաէկոլոգիական է»,- ընդգծեց նա՝ մտահոգ ավելացնելով, որ բնական է, որ ջերմաստիճանի խիստ բարձրացումը մեր քաղաքում պետք է ավելի շատ դրսևորվի:
Կ.Դանիելյանի խոսքով՝ Երևանը չի հասցնում օրվա ընթացքում սառչել, իսկ կանաչ ու ջրային տարածքները չեն կարողանում օդը մաքրել ու զովացնել:
