ArmVoice տելեգրամ ալիքը հրապարակել է Արցախի նախագահ Արայիկ Հարությունյանի և Արցախի խորհրդարանի նախկին պատգամավոր, ազատամարտիկ Ռուսլան Իսրայելյանի՝ պատերազմի օրերին արված հեռախոսազրույցի ձայնագրությունը։
Ըստ ձայնագրության՝ Արցախի նախագահ Արայիկ Հարությունյանը 10 օր շարունակ օգնության խնդրանքով դիմել է Երևանին և մասնավորապես նշել. «Տասը օր ա՝ ասում … Ստեփանակերտը մնացալ ա էրկու կաղլեգու հույսին»։ Զրույցից նաև պարզ է դառնում, որ Երևանից Արցախը օգնություն չի ստացել։
Ռուսլան Իսրայելյանը հաստատել է, որ իր մասնակցությամբ նման հեռախոսազրույց է եղել, միևնույն ժամանակ հերքելով, որ ինքն է այն տարածել։
Արցախի նախագահի խոսնակ Վահրամ Պողոսյանից մեկնաբանություն ստանալ չհաջողվեց, քանի որ վերջինս Շուշիի վերաբերյալ իր հայտնի գրառումից հետո առհասարակ մամուլի հետ շփումներ չի ունենում։
Արցախի նախագահ Ա. Հարությունյանի գլխավոր խորհրդական Ռուդիկ Հյուսնունցն էլ «Առաջին լրատվական»-ի հետ զրույցում ասաց, որ ձայնագրության բովանդակությունը մեկնաբանել չի ցանկանում, բայց զարմացած է, թե այն ինչպես կարող էր տարածվել.«Իմ խորհուրդն է, որ դիմեք նրան, ում հեռախոսից ձայնագրությունը դուրս է եկել, որպեսզի ավելի ճշգրիտ մեկնաբանություններ հնչեն։ Ես չեմ ուզում մեկնաբանել ձայնագրությունը։ Ընդհանրապես ես չգիտեմ՝ դա որտեղից է տարածվել։ Ես ինչքան տեղյակ եմ՝ ինքը հերքում է, որ տարածողն ինքն է։ Ես չգիտեմ, թե այն ինչպես է հայտնվել համացանցում»։
Արցախցի իրավապաշտպան, «Հելսինկյան 92» նախաձեռնության արցախյան կոմիտեի նախագահ Կարեն Օհանջանյանն էլ տարակուսում է, թե ինչու էր Արցախի նախագահը նման մտահոգություն հայտնում Ռուսլան Իսրայելյանի հետ զրույցում և ոչ բարձրաձայն. «Փաստորեն Նիկոլ Փաշինյանի կողմից պետական դավաճանություն է եղել, իսկ Արայիկ Հարությունյանը վախեցե՞լ է այդ մասին ասել։ Դա նշանակում է մեկ բան՝ նա այդ ամենի հանցակիցն է եղել։ Ասեմ ավելին՝ դեռ հոկտեմբերի 7-ին, առավոտյան 6-ին Արայիկ Հարությունյանն ինձ կանչել է իր մոտ, պատմել Նիկոլ Փաշինյանին ու ՌԴ նախագահ Պուտինի հեռախոսազրույցի որոշ մարմանասների մասին ու հանկարծ ինձ հարցրել՝ դու կարծում ես սա կապիտուլյացիա՞ է։ Այսինքն՝ դեռ հոկտեմբերի 7-ին, իմանալով, թե ինչ է լինելու, ուղիղ մեկ ամիս և երեք օր շարունակվել է մեր լավագույն հերոսների կոտորածը։ Սա չի՞ նշանակում արդյոք, որ իրենք հանցակիցներ են»,-«Առաջին լրատվական»-ի հետ զրույցում ասաց նա։
Մեր զրուցակիցը նաև հորդորեց պարզել՝ դա Արայիկ Հարությունյանին «փրկելու համար» նոր ստեղծված հեռախոսազրույց է, թե իսկապես ավելի վաղ է տեղի ունեցել.«Ես մասնագետ չեմ և այդ մասին ոչինչ ասել չեմ կարող»,-եզրափակեց նա։
