Արցախում ներքաղաքական վերադասավորումների պատճառով տասնյակ մարդիկ հայտնվել են գործազուրկ դառնալու շեմին։Այս խնդրի հետ մեկտեղ, սակայն, այդ վերադասավորումներն ուշագրավ զարգացումներ են խոստանում։
Արցախի անվտանգության խորհրդի նախկին քարտուղար Սամվել Բաբայանի հիմնած «Միասնական հայրենիք» կուսակցության խոսնակ, խորհրդի աշխատակազմի նախկին աշխատակից Անուշ Դոլուխանյանը ֆեյսբուքյան իր էջում գրել է․
«Արայիկ Հարությունյանը երեկ ընդունել է անվտանգության խորհրդի գրասենյակի ղեկավար կազմին՝ պարզաբանելու գրասենյակի շուրջ ստեղծված իրավիճակը: Ա. Հարությունյանը հավաստիացրել է, որ աշխատակիցներին հնարավորություն է տրվելու շարունակել աշխատանքը պետական կառավարման համակարգում:
Ի պատասխան այն հարցին, թե ինչու է գրասենյակի ձևաչափը պահպանվում, սակայն աշխատակազմն ամբողջությամբ արձակվում, Ա. Հարությունյանը նշեց, որ դա նորանշանակ անվտանգության քարտուղարի պահանջն էր, որին ինքը պիտի ընդառաջեր համագործակցության շրջանակներում»,-նշել է նա:
Ավելի վաղ Դոլուխանյանը հայտարարել էր, որ Արցախի անվտանգության խորհրդի նորանշանակ քարտուղարը վտանգել է ավելի քան 50 ընտանիքի սոցիալական անվտանգություն։
«Արցախի անվտանգության խորհրդի գրասենյակի աշխատակազմը զգուշացվել է. նախագահականից ասել են` երկուշաբթիից գրասենյակում մարդ չլինի, նորանշանակ քարտուղարը իր թիմով է գալու»,-նշել էր նա։
«Առաջին լրատվական»-ի հետ զրույցում Անուշ Դոլուխանյանը պարզաբանեց, որ Արցախի նախագահ Արայիկ Հարությունյանի հետ հանդիպմանն ինքը չի ներկայացրել «Միասնական հայրենիք» կուսակցության շահերը.«Նաև այն գրառումները, որ ես արել եմ, արել եմ որպես Անվտանգության խորհրդի կառույցի ստորաբաժանումներից մեկի ղեկավար, ով պատասխանատվություն է կրում իր աշխատակիցների համար։ Հասկանալի է, որ կառուցվածքային փոփոխություն է լինելու և իրավական հնքը պահպանվում է, որ մարդիկ կրճատվեն, բայց ի՞նչ սկզբունքով ու ի՞նչ իրավունքով»,-«Առաջին լրատվական»-ի հետ զրույցում ասաց նա։
Շարունակելով մեր զրուցակիցն ասաց.«Եթե ինչ-որ մեկը հայտարարում է, որ ինքը Արցախը փրկելու է եկել, ապա ինչու՞ է այլոց սոցիալական իրավունքները խախտվում»։
Անուշ Դոլուխանյանը փոխանցեց նաև, որ իրենց հարցին, թե ինչու է ամբողջ անձնակազմը կրճատվում, Արայիկ Հարությունյանը պատասխանել է, որ դա նորանշանակ Անվտանգության խորհրդի քարտուղարի պահանջն է.«Իրավական հիմքերը դեռ ապահովված չեն, այսօր որևէ մեկը աշխատանքից ազատվելու մասին դեռևս գրավոր ծանուցված չէ»։
Մեր զրուցակիցը նաև չգիտի ինչքանով է իրականությանը համապատասխանում այն հայտարարությունը, թե Անվտանգության խորհրդի այդ աշխատակիցները պետական կառավարման համակարգում աշխատանք կստանան։
Հելսինկյան նախաձեռնություն-92 Լեռնային Ղարաբաղի կոմիտեի համակարգող Կարեն Օհանջանյանը «Առաջին լրատվական»-ի հետ զրույցում ստեղծված իրավիճակին այլ մեկնաբանություն տվեց։ Նրա խոսքերով՝ այժմ Արցախում նախագահ Արայիկ Հարությունյանը հեղինակազրկված է, ունի լեգիտիմության խնդիր և քննարկվող տարբերակներից մեկն այն է, որ Անվտանգության խորհուրդը ստանձնի երկրի իրական ղեկավարումը.«Արայիկ Հարությունյանը պետական հանցագործ է, ազգային դավաճան ու այժմ մենք ճգնաժամի առաջ ենք կանգնած։ Մեր երկիրը, ավելի ճիշտ՝ այն, ինչ մնացել է մեր երկրից պետք է նոր ղեկավարներ ունենա։ Հիմա մենք փնտրում ենք տարբերակներ,թե ինչպես է հնարավոր մեր Սահմանադևության շրջանակներում այնպես անել, որ Արայիկ Հարությունյանը ֆորմալ առումով մնա նախագահ, սակայն մյւոս կառույցները աշխատեն»,-«Առաջին լրատվական»-ի հետ զրույցում ասաց նա։
Նրա խոսքերով՝ քննարկվող տարբերակներից մեկն էլ Անվտանգության խորհուրդն է. «Որի կազմի մեջ պետք է մտնեն բանակի տարբեր գեներալները։ Մեր երկրում անվտանգության խորհուրդն ավելի կարևոր դեր է խաղալու, քան նախագահ կոչեցյալը, այդ խորհրդի կազմի մեջ կարող է մտնել նաև Ազգային ժողովրդավարական կուսակցության նախագահ, ԱԺ նախկին խոսնակ Աշոտ Ղուլյանը։ »։
Ըստ Օհանջանյանի՝ խորհրդարանում ևս կլինեն փոփոխություններ. «Մեծամասնությունը կոալիցիա կստեղծի ոչ թե Սամվել Բաբայանի «Միասնական Հայաստանի»-ի, այլ Դաշնակցության հետ։ Տարբերակ է նաև, որ Արցախի ԱԺ ղեկավարը լինի Դաշնակցությունից։ Դաշնակցությանը կտրվի նաև Արտաքին գործերի նախարարի պորտֆելը։ Իսկ երկու դավաճաններ Նիկոլ Փաշինյանն ու Արայիկ Հարությունյանը որքան հնարավոր է շուտ պետք է լքեն իրենց պաշտոնները»։
