Թուրք-ադրբեջանական սպառնալիքները, փաստորեն, ոչ միայն չեն չեզոքացել, այլև շարունակում են մնալ անհանգստացնող։
Հայաստանն այս փուլում ի՞նչ պետք է անի։ Պետք է սկսի գույքագրե՞լ թուրք-ադրբեջանական նոր մարտահրավերները․ «Առաջին լրատվական»-ի հարցին միջազգայնագետ Սուրեն Սարգսյանը պատասխանեց․ «Մարտահրավերները, կարծում եմ՝ ակնհայտ են։ Ասեմ ավելին՝ արդեն պարզ են դառնում այդ մարտահրավերների ծավալները։ Այստեղ հարցեր կան։ Գիտենք, որ թուրքական բանակը Իգդիրում է, չնայած՝ տարբեր տեղեկություններ եղան դրա հետ կապված, որ այդ բանակը եկել է, հետո մի մասը դուրս է եկել, հետո նորից վերադարձել է։ Համենայնդեպս, մենք գիտենք, որ Թուրքիան այստեղ լուրջ ուժեր է կենտրոնացնում։ Գիտենք նաև, թե ինչպիսին է ռուսական ազդեցությունը մեր տարածաշրջանում։ Գիտենք, որ խաղաղապահ ուժեր կան, գիտենք, որ լրացուցիչ զինված ուժեր են տեղակայվում մեր տարածաշրջանում։ Դա Արցախի և Հայաստանի անվտանգության երաշխիքներից մեկն է։ Համենայնդեպս, ես համարում եմ, որ դեռևս ոչինչ չի ավարտվել, և ամեն ինչ դեռ շարունակություն է ունենալու։
Եկեք իրավիճակին հետևենք ու հասկանանք, թե ինչ է կատարվել։ Իսկ իրավիճակն իրականում այնպիսին է, որ պատերազմական գործողությունների արդյունքներով ոչ ոք գոհ չէ։ Այսինքն՝ ոչ ոքի չի բավարարում այն իրավիճակը, որը ձևավորվել է։ Բնականաբար, մեզ չի բավարարում, որովհետև մենք կորցրել ենք ոչ միայն յոթ շրջանները, այլև Արցախի կեսը։ Ադրբեջանին նույնպես չի բավարարում, որովհետև Ադրբեջանը ցանկանում է Արցախի մնացած հատվածը, որ չի կարողացել վերցնել։ Ռուսաստանին էլ չի բավարարում, որովհետև ռուսական խաղաղապահ ուժերը պետք է տեղակայվեին ավելի մեծ, ավելի լայն տարածքի վրա։ Բնականաբար, Թուրքիային չի բավարարում, որովհետև Թուրքիան դեռևս ոչինչ չի ստացել այս հակամարտության ընթացքում։ Իրանին ձեռնտու չէ այս իրավիճակը, որովհետև նրա սահմանի երկայնքով ամբողջ հատված անցել է ադրբեջանական ենթակայության տակ»։
Մանրամասները՝ տեսանյութում։
