ՌԴ նախագահ Վլադիմիր Պուտինը բարձր է գնահատում Թուրքիայի նախագահ Թայիփ Էրդողանի կառուցողական մոտեցումը, ի հայտ եկող նրբություններն ու տարաձայնությունները լուծվում են թուրք գործընկերների հետ երկխոսության ընթացքում, հայտարարել է ՌԴ նախագահի մամուլի խոսնակ Դմիտրի Պեսկովը:
«Ի սկզբանե մենք ունեցել ենք տարբեր տեսակետներ … Ռուսաստանը, ՄԱԿ-ը, Միացյալ Նահանգները, համանախագահները, Ֆրանսիան և եվրոպական այլ երկրներ այն մոտեցման կողմնակիցներ են, որ հակամարտության քաղաքական և դիվանագիտական մեթոդներով կարգավորումն այլընտրանք չունի (Լեռնային Ղարաբաղում): Մենք առաջվա պես մնում ենք այդ տեսակետին: Թուրքիան այլ տեսակետ ունի, բայց, այնուամենայնիվ, տարածաշրջանային տարբեր խնդիրներ լուծելիս Ռուսաստանի և Թուրքիայի միջև փոխգործակցությունը ցույց է տվել դրա արդյունավետությունը»,-ասել է Պեսկովը:
Նա շեշտել է, որ Ռուսաստանը բարձր է գնահատում նման փոխգործակցությունը և փոխվստահության ու համագործակցության մակարդակը:
«Դուք գիտեք, որ մեր նախագահը նաև բարձր է գնահատում իր թուրք գործընկերոջ` նախագահ Էրդողանի կառուցողական մոտեցումը: Նրանք շարունակում են շատ սերտ և առարկայական երկխոսությունը՝ ինչն իհարկե չի անցնում առանց որոշակի նրբերանգների իրենց մոտեցումներում: Տարաձայնությունները, որոնք մենք նկատի ունենք, կկարգավորվենք մեր թուրք գործընկերների հետ երկխոսության ընթացքում»,- ասել է Պեսկովը՝ նշելով, որ Կրեմլում գոհ են, որ հնարավոր է եղել համատեղ հայտարարություն ստորագրել:
