Грузия Online-ի փոխանցմամբ՝ Վրաստանի արտգործնախարարությունը ողջունում է հուլիսի 29-ին ԱՄՆ Սենատի կողմից ընդունված «Վրաստանի տարածքային ամբողջականության ու ինքնիշխանության նկատմամբ ընթացիկ խախտումների, Վրաստանի՝ միջազգայնորեն ճանաչված սահմաններում հակամարտության խաղաղ ու արդար կարգավորման վերաբերյալ Սենատի դիրքորոշման» մասին բանաձևը։
Վրաստանի ԱԳՆ-ի տարածած հայտարարության մեջ նշված է, որ Սենատի ընդունած բանաձևն աջակցում է Վրաստանի տարածքային ամբողջականությանը և Ռուսաստանի կողմից օկուպացված տարածքներ է որակում Աբխազիան և Հարավային Օսիան։ Բանաձևում Ռուսաստանին կոչ է արվում օկուպացիոն զորքերը դուրս բերել այդ տարածքներից։ Հիշյալ բանաձևի հեղինակները սենատորներ Ջեյն Շահինն ու Լինդսի Գրեմն են։
Վրաստանի ԱԳՆ-ը նշել է. «ԱՄՆ Սենատի ընդունած բանաձևը կարևոր քայլ է ԱՄՆ-ի և Վրաստանի ռազմավարական ու գործընկերային հարաբերություններում։ Վրաստանին առնչվող բանաձևի միաձայն ընդունմամբ Սենատը պաշտոնապես հայտնեց իր հստակ և միացյալ դիրքորոշումը Վրաստանի տարածքային ամբողջականության ու ինքնիշխանության նկատմամբ և Ռուսաստանին անվանեց օկուպանտ։
ԱՄՆ Սենատի կողմից այդ բանաձևի ընդունումը հաստատում է, որ Վրաստանի ինքնիշխանությանը, անկախությանը և սահմանների անխախտությանն աջակցելը, ինչպես նաև Աբխազիան ու Հարավային Օսիան Ռուսաստանի կողմից օկուպացված ճանաչելը ԱՄՆ-ի քաղաքականության մի մասն են»։
Հիշեցնենք, որ ամերիկյան օրենսդիրների կողմից 5-էջանոց այդ փաստաթղթի ընդունման կապակցությամբ ԱՄՆ-ում Վրաստանի դեսպան Թեմուր Յակոբաշվիլին հայտարարել է, որ ԱՄՆ Սենատի կողմից ընդունված այդ փաստաթուղթը և դրանից առաջ Սպիտակ տան արած հայտարարությունը հաստատում են այն, որ Վրաստանի տարածքային ամբողջականության հարցը սկզբունքային է ԱՄՆ համար։
