Այսօր ԱԻՆ-ի գործառույթներից առաջնահերթ է քաղաքացիական պաշտպանության կազմակերպումը: Ռազմական դրության պայմաններում ստեղծվել է սոցիալական և նյութական շտաբ, ԱԻՆ-ը ստանձնել է նաև այդ շտաբի աշխատանքները՝ հումանիտար օգնություն է հասցվում Արցախ՝ առաջնագիծ և ապաստարաններ, ինչպես նաև Արցախից ժամանած քաղաքացիներին: Զուգահեռ իրականացվում են նաև մի շարք գործառույթներ: Այս մասին «Առաջին լրատվական»-ի հետ զրույցում ասաց ՀՀ արտակարգ իրավիճակների նախարարի տեղակալ Արմեն Փամբուխչյան:
Նա նաև հավելեց, որ փրկարար ծառայության բժշկական անձնակազմը կարևոր աշխատանքներ է իրականացնում. «Դաշտային հոսպիտալ ունենք, որտեղ վիրավորներին առաջին բուժօգնություն է ցուցաբերվում, մինչև որ նրանց հասցնում են այս կամ այն բուժկենտրոն: Մեր համապատասխան մասնագետները բավականին արդյունավետորեն հոգեբանական աջակցություն են ցուցաբերում Արցախից ժամանած մեր հայրենակիցներին: Նաև կազմակերպվում են մշակութային միջոցառումներ երեխաների համար»:
Անդրադառնալով դիտարկմանը, որ մի քանի օր առաջ փորձնական հնչեցին օդային տագնապի ազդանշաններ և դա խուճապ առաջացրեց, Արմեն Փամբուխչյանը նշեց. «Դա կախված է ինչպես մեր աշխատանքից, այնպես էլ մեր հասարակության գիտակցումից, հասարակության համար անսովոր է լսել տագնապի ազդանշանները… Օդային տագնապները տրվում են, որպեսզի զգոն լինենք, խուճապի մատնվել պետք չէ»:
Մանրամասն՝ տեսանյութում:
