«Արցախում բարձր մակարդակով է կազմակերպվում բուժօգնությունը, անխափան մատակարարմամբ և բարձր մասնագիտական ներուժով, աշխատում են շատ մեծ նվիրումով, հոգատար, անգամ ռմբակոծման ներքո արհեստավարժ գործողությունները չեն դադարում բունկերներում և այն հատվածներում, որտեղ անվտանգ է հիվանդների և բուժանձնակազմի համար: Այս մասին «Առաջին լրատվական»-ի հետ զրույցում ասաց ԵՊԲՀ ռեկտոր Արմեն Մուրադյանը:
Նրա խոսքով՝ մարդկային կանոններից դուրս իրավիճակ է, երբ մարդկային կյանք ես փրկում, բայց այդ պահին հենց դու կարող ես թիրախում հայտնվել: «Բայց բժիշկները, բուժանձնակազմը մեծ նվիրումով են աշխատում, ոչ մեկի մոտ կասկած չտեսա վերադառնալու անհրաժեշտության հետ կապված: Այնտեղ են նաև մեր սփյուռքահայ գործընկերները Մոսկվայից, Լոս Անջելեսից, ովքեր ինքնակամ ժամանել են և միանգամից մեկնել Արցախ ու ներգրավվել աշխատանքներում: Նրանց ներկայությունն էլ ավելի է պարտավորեցնում և բարձրացնում բուժօգնության որակը»,- նշեց Արմեն Մուրադյանը:
«Խոսքը հրազենային վնասվածքների մասին չէ, մենք խոսում ենք հրթիռակոծված, բազմաբեկորային վնասվածքների մասին: Օգտագործվում են կասետային ռումբեր, որոնք արգելված է օգտագործել. սա ռազմական հանցագործության մասին է վկայում»,- ընդգծեց Արմեն Մուրադյանը: Նա վստահեցրեց, որ այս պահին բուժսարքավորումների և դեղորայքի լիարժեք ապահովվածություն կա:
Մանարամսն՝ տեսանյութում:
