Այսօր մենք գործ ունենք տգիտության հետ, և մեր թշնամին պարտվելու է հենց իր տգիտությանը: Այս մասին «Առաջին լրատվական»-ի հետ զրույցում ասաց Գ. Սունդուկյանի անվան ազգային ակադեմիական թատրոնի տնօրեն Վարդան Մկրտչյանը:
«Մենք առաջին անգամ չենք հայտնվել նման իրավիճակում՝ մենակ մնալու առումով: Այս ամենն ինձ հիշեցնում է մեր էպոսի հերոսի՝ Դավթի երրորդ զարկը, երբ այլևս ոչ մի խաբկանքի չպետք է տրվել, ոչ մի մոլորեցնող բանի վրա չպետք է շեղվել, սա վերջին՝ երրորդ զարկն է, որը չպետք է բաշխվի որևէ մեկին, սա մեր իրավունքի զարկն է լինելու:
100 տարի հետո նույնը կարծես կրկնվում է, որովհետև մեր թշնամին ինքնաճանաչողության և ճանաչողության խնդիր ունի: Այս 100 տարվա ընթացքում նա ոչ մի կերպ չի ճանաչում հայ մարդուն, հայ մշակույթը, նրա ուղեղը կարծես բլոկավորված է»,- նշեց Վարդան Մկրտչյանը:
Նրա դիտարկմամբ՝ փոխվել է հայի հոգեբանությունը՝ թղթե շերեփի փոխարեն արդեն մեր ձեռքին երկաթե շերեփ է. «Փառահեղ են գործում մեր զինվորականները, 100 տարվա դասերը սերտած են գործում: Միջազգային հանրությանը սպասելով՝ սխալվել ենք ժամանակին… Մենք արդեն երկաթե շերեփով ենք խոսում, և համոզված եմ՝ միջազգային հանրության վերաբերմունքը փոխվելու է. ցանկացած բանական մարդ այսօր մեր գոյության կռվի կողքին է կանգնած»:
Մանրամասն՝ տեսանյութում:
