Ադրբեջանի ղեկավարն ինֆորմացիոն բլոկադայի մեջ է և չի տիրապետում իր երկրում տեղեկատվությանը՝ նախօրեին հայտարարեց Հայաստանի ՊՆ ներկայացուցիչ Արծրուն Հովհաննիսյանը՝ կապված ալիևյան գրառումների հետ, թե իրենք «գրավել» են Մատաղիսը կամ Ջաբրայիլը:
Արծրուն Հովհաննիսյանը թերևս փոքր-ինչ մեղմ է բնորոշել Ադրբեջանի ղեկավարի վիճակը: Բանն այն է, որ նա ոչ թե ինֆորմացիոն բլոկադայի մեջ է, այլ Ադրբեջանի ղեկավար գործնականում գոյություն չունի այլևս՝ Ադրբեջանի ղեկավարն այլևս Էրդողանն է, և Ադրբեջանը նոր ղեկավար կարող է ունենալ երկու պարագայում. կա՛մ եթե նոր ղեկավար ունենա Թուրքիան, կա՛մ եթե Թուրքիան Ադրբեջանը հանձնի որևէ այլ երկրի, կա՛մ որևէ այլ ուժային կենտրոն խլի Ադրբեջանը Թուրքիայի ձեռքից: Ընդ որում, այդպիսի զարգացումը բացառել պետք էլ չէ:
Ալիևը չի ղեկավարում Ադրբեջանը: Նա այժմ փորձում է լուծել ընդամենը անձնական անվտանգության խնդիր՝ պատերազմի իր համար խիստ անբարենպաստ ելքի համար: Ընդ որում, այդ անբարենպաստ ելք ասվածն անշուշտ ունի մեկ այլ կարևոր հանգամանք: Խնդիրը լոկ այն չէ, որ ադրբեջանցիներն ու ահաբեկիչները կկրեն պարտություն, և դա կլինի Ալիևի համար անբարենպաստ ելք: Նրա համար անբարենպաստ ելքերը բազմաթիվ են, և դրանց մի մասն արդեն կա՝ թուրք-ադրբեջանա-ահաբեկչական բլից կրիգը ձախողվել է, միաժամանակ աշխարհը գործնականում ճանաչել է, որ Թուրքիան Ադրբեջանը վերածել է ահաբեկչական զորանոցի: Դրանք Ալիևի համար արդեն իսկ խիստ անբարենպաստ ելք են, որոնց ազդեցությունը նա զգալու է արդեն բուն սանձազերծած պատերազմի որևէ ելքից անկախ:
Էրդողանը ոչ միայն գործնականում վերացրել է Ադրբեջանի ղեկավարի կարգավիճակը, այլև այդ կարգավիճակի դե ֆակտո նախկին տիրոջը դրել է գործնականում միջազգային ահաբեկչի կարգավիճակում՝ այդպիսով նրան դարձնելով լիակատար պատանդ իր ռազմաքաղաքական ծրագրերի համար:
