ԱՄՆ Սենատը երեկ մերժել է Ստորին պալատի կողմից ընդունված ԱՄՆ օրենքը, համաձայն որի պետք է բարձրացվեր պետական պարտքի վերին հնարավոր շեմը, ինչը թույլ կտար խուսափել դեֆոլտից: Այս մասին հաղորդում է Fox News-ը: Սենատի դեմոկրատական մեծամասնությունը ճգնաժամը հաղթահարելու հանրապետականների օրինագիծը ծայրահեղական է համարել, այդ իսկ պատճառով մերժել է Ներկայացուցիչների պալատում ընդունված օրենքը:
«Իզուր ժամանակ են կորցրել: Կոնգրեսի առաջնորդները պետք է անհապաղ սկսեն աշխատել` փոխզիջման հասնելու համար, որպեսզի խուսափենք դեֆոլտից»,- հայտարարել է Օբամայի մամուլի խոսնակ Ջեյ Քարնին: Հանրապետականները պնդում էին, որ պետական պարտքի վերին շեմի բարձրացումը անպատասխանատու կլիներ, եթե այդ քայլը չփոխկապակցվեր պետական ծախսերի կրճատման հետ, ինչը մերժում են դեմոկրատները: Հիշեցնենք, որ Սենատում մեծամասնություն ունեն դեմոկրատները, իսկ Ներկայացուցիչների պալատում` հանրապետականները:
