ԲՀԿ խմբակցության պատգամավոր Միքայել Մելքումյանը հերքում է այն տեղեկությունները, թե ԲՀԿ խմբակցությունը լքող հաջորդ պատգամավորը կարող է ինքը լինել։
«Ես շարունակելու եմ լինել կուսակցության 10 ազդեցիկ քաղաքական գործիչներից մեկը։ ԲՀԿ խմբակցութունը լքելու լուրը չի համապատասխանում իրականությանը։ Ես շարունակում և շարունակելու եմ իմ աշխատանքը կուսակցությունում և խմբակցությունում»,- նշեց Միքայել Մելքումյանը։
Ավելի վաղ «Ժամանակ» թերթը գրել էր․ «ԲՀԿ խմբակցությունը լքող հաջորդ պատգամավորը կարող է լինել Միքայել Մելքումյանը: Շատերն են նկատել, որ նախկինում քաղաքականապես ակտիվ Մելքումյանը վերջին ժամանակահատվածում խիստ պասիվ է և չկա հրապարակային գործունեության դաշտում:
Ըստ որոշ տեղեկությունների՝ այդ ամենը կարող է կապված լինել նրա դեմ հարուցված քրեական գործերի հետ»:
Նրա դեմ հարուցված քրեական գործերի վերաբերյալ ևս Մելքումյանը հերքեց, նշելով, որ նման բան չկա, տեղեկությունն իրականությանը չի համապատասխանում։