«Առաջին լրատվական»-ի զրուցակիցն է Ուրուգվայի ՀՅԴ Հայ դատի հանձնախմբի ներկայացուցիչ Արփի Հոչաչանյանը:
– Տիկին Հոչաչանյան, թեև Ուրուգվայի ԱԳՆ-ն Հայաստանում Տավուշի լարվածության վերաբերյալ կարծիք հայտնելուց ձեռնպահ մնաց, սակայն իշխող Ազգային կուսակցությունը քննարկելու է Հայաստանի սահմանին տիրող իրավիճակը։ Ի՞նչ ակնկալիքներ ունեք։
– Գալով Տավուշի շրջանի լարվածությանը, հուլիսի 12-ից ի վեր Ադրբեջանի կողմից Հայաստանի դեմ իրագործված մարտական գործողություններին՝ այո, երկրիս ԱԳ նախարարությունը և իշխող Ազգային կուսակցությունը տակավին կարծիք չեն հայտնել, սակայն մենք գիտենք, և դա պատմական իրողություն է, որ նրանք միշտ եղել են Հայ Դատի կողքին:
Ուրեմն պատասխանելով ձեր հարցին՝ կարող ենք ասել, որ անշուշտ ակնկալում ենք այդ մեկը, բայց այս պարագայում լավ է ժամանակ տալ որոշում կամ կեցվածք ներկայացնելու համար:
– Ուրուգվայը, որ տարի առաջ քննարկում էր Արցախը ճանաչելու մասին հարցը, հնարավո՞ր է՝ այդ նույն օրակարգը հետ բերի։ Որքանո՞վ կա նման հավանականություն։
– Գալով Արցախը ճանաչելու հարցին՝ այո, իրողություն է, որ մի քանի տարի առաջ այս հարցը քննարկվել էր և շարունակում է մնալ Ուրուգվայի Հայ Դատի հանձնախմբի օրակարգում:
Նշենք, որ 2019-ին, երբ Արցախի ԱԳ նախարար Մասիս Մայիլյանը այցելեց Ուրուգվայ, քաղաքական գործիչների շարքում հանդիպում ունեցավ նաև նախկին սենատոր և ներկայումս երկրի նախագահ Լուիս Լակալե Պոուի հետ, ուստի ինքը քաջ տեղյակ է Արցախի հարցից, բայց լավ է ճշտել, որ մենք մարտի 1-ից ի վեր ունենք նոր կառավարություն և, իհարկե, այժմ հնարավորություն չունենք արտահայտվելու, թե ինչ ուղղությամբ կընթանա ի նպաստ Արցախի Հայ Դատի գործունեությունը օրվա իշխանությունների հետ:
– Գիտենք, որ Ուրուգվայի հայկական կազմակերպությունները հատուկ կարծիք ստանալու նպատակով դիմել են իշխանություններին՝ հստակություն մտցնելու, թե երկու երկրներից որ մեկն է խախտում պայմանավորվածությունները։ Ի՞նչ պատասխան եք ստացել։
– Այս ուղղությամբ ունեցել ենք բավական դրական պատասխան: Օրինակ՝ Ուրուգվայի «Լայն ճակատ» կուսակցությունը (նախկին իշխող կուսակցություն) և «Կոլորադո» կուսակցությունը հրապարակային hաղորդագրություններով դատապարտել են Հայաստանի Հանրապետության դեմ Ադրբեջանի հարձակումը՝ զորավիգ կանգնելով հայ ժողովրդի իրավունքներին:
Նույն ձևով Ուրուգվայում Լեռնային Ղարաբաղի ֆորումը ևս հրապարակել է հայտարարություն՝ «մերժելով և խստորեն դատապարտելով Հայաստանի Հանրապետության դեմ Ադրբեջանի իրականացրած զինյալ հարձակումը, պահանջելով հայ ժողովրդի դեմ գործադրված բռնության անմիջական դադարեցում և կոչ անելով ամբողջական հարգանք ցուցաբերել միջազգային իրավունքի նկատմամբ»: Բացի քաղաքական կուսակցություններից, նույն ուղղությամբ արտահայտվել են նաև մի շարք սենատորներ և տիբուդատներ՝ դատապարտելով Ադրբեջանին:
– Ուրուգվայի հայկական համայնքում ինչպիսի՞ տրամադրություններ են։ Տարբեր երկրներում ցույցեր են, ադրբեջանական և հայկական կողմերի միջև բախումներ։ Ուրուգվայում արդյոք նախապատրաստվո՞ւմ է նման ցույց, թե՞ ոչ։
– Ուրուգվայի հայկական համայնքը ևս խիստ մտահոգ է հայ-ադրբեջանական սահմանի լարվածության կապակցությամբ և անշուշտ հետևում է բոլոր իրադարձություններին: Մեր աշխատանքները այս օրերին կենտրոնացած են ընդհանրապես ի նպաստ Հայաստանի քաղաքական հայտարարություններ ձեռք բերելու վրա:
-Առհասարակ, որքանո՞վ է լավ կարողանում աշխատել հայկական լոբբին այս օրերին։
– Հայկական լոբբին ընդհանրապես աշխատում է նկատի ունենալով երկրի ներկա քաղաքական իրավիճակը և անշուշտ այլ լոբբիների աշխատանքը։
