Հունաստանի վարչապետ Կիրիակոս Միցոտակիսը կոչ է արել Եվրամիության ղեկավարներին հստակ դիրքորոշում որդեգրել և «կոշտ պատժամիջոցներ» մտցնել Թուրքիայի դեմ՝ ի պատասխան Անկարայի աճող ագրեսիային Հունաստանի և Կիպրոսի դեմ՝ տեղեկացնում է Ekathimerini-ն։
Ըստ Հունաստանի կառավարության աղբյուրի, Միցոտակիսը կոչ է արել միջոցներ ձեռնարկել Անկարային զսպելու համար Բրյուսելում ԵՄ գագաթնաժողովի ընթացքում, որի նպատակն է բանակցել կորոնավիրուսից հետո վերականգնման ֆոնդի պարամետրերի շուրջ։
Անդրադառնալով Արևելյան Միջերկրական ծովում Թուրքիայի խախտումներին, ԵՄ առաջնորդներին ուղղված կարճ դիմումի մեջ Հունաստանի վարչապետը շեշտեց, որ Թուրքիային չպետք է թույլ տրվի խախտել երկու անդամ պետությունների ինքնիշխան իրավունքները:
Միցոտակիսը նաև անդրադարձել է Թուրքիայի կառավարության սադրիչ որոշմանը` ՅՈՒՆԵՍԿՕ-ի Համաշխարհային ժառանգության տարածքը՝ Հագիա Սոֆիան մզկիթի վերածելու մասին, ասելով, որ սա ցույց է տալիս Անկարայի վերաբերմունքը միջազգային համաձայնագրերին, փոխադարձ հարգանքին և միջկրոնական երկխոսության գաղափարին:
Նա նաև խնդրել է, որ ԵՄ-ի և Թուրքիայի միջև հարաբերությունները ավելի մանրամասն քննարկվեն Եվրախորհրդի հաջորդ նիստում: