ԵԱՀԿ-ում ԱՄՆ դեսպան Ջեյմս Ստյուարտ Գիլմորը, ԵԱՀԿ Մշտական խորհրդի նիստում, պատասխանել է իր ռուս գործընկեր Ալեքսանդր Լուկաշևիչին և ափսոսանք հայտնել, որ Մոսկվան շարունակում է ապատեղեկատվություն տարածել Վրաստանում և Ուկրաինայում կենսաբանական լաբորատորիաների վերաբերյալ:
«Մենք դա քննարկել էինք նախկինում: Մենք գիտենք, որ Ուկրաինայի և Վրաստանի հետ միասին ջանքեր են գործադրվում որոշ սարսափելի հիվանդություններ հայտնաբերելու, ինչպես նաև հնարավորություններ ստեղծելու խաղաղ հետազոտության և պատվաստանյութերի զարգացման համար»,-ասել է ամերիկացի դիվանագետը:
Գիլմորը գտնում է, որ Վրաստանը եւ Ուկրաինան գիտական ոլորտում հաջողությունների են հասել:
«Անկեղծորեն, տարօրինակ կլինի ենթադրել, որ ինչ-որ խորհրդավոր բան է կատարվում Ուկրաինայում, Վրաստանում կամ այլուր: Եվ ես կարծում եմ, որ Ռուսաստանի ժողովուրդը, որն ինչպես բոլորը, տառապում է կորոնավիրուսից, չի հավատա նման տեղեկությունների», – ասել է Գիլմորը:
Մոսկվան անհանգստացած է ԱՄՆ-ի ռազմա-կենսաբանական գործունեությամբ երկկողմանի նշանակության լաբորատորիաներում, որոնք գտնվում են Ուկրաինայում և Վրաստանում, հայտարարել է ԵԱՀԿ-ում Ռուսաստանի դեսպան Ալեքսանդր Լուկաշևիչը:
«Մենք համոզված ենք, որ մենք բոլորս իրավունք ունենք իմանալ, թե իրականում ինչ է «եփվում» ամերիկյան կենսաբանական լաբորատորիաներում»,-ասել է նա:
Ռուսաստանի Դաշնության Արտաքին գործերի նախարարության տվյալների համաձայն՝ ԱՄՆ-ում օդում վարակված մոծակներ տարածելու համար անօդաչու սարք է արտոնագրված: