Սննդի անվտանգության տեսչությունը սպանդանոց կառուցելու 250-ից ավելի հայտ է ստացել։ Այդ մասին «Առաջին լրատվական»-ի հետ զրույցում նշեց Սննդամթերքի անվտանգության տեսչական մարմնի իրազեկման, խորհրդատվության և հանրության հետ կապերի բաժնի պետ Անուշ Հարությունյանը։
Հիշեցնենք, որ ՍԱՊԾ ղեկավար Գեորգի Ավետիսյանը դեռևս փետրվար ամսին հայտարարել էր, որ հուլիսի մեկից սկսած՝ հանրապետության տարածքում վաճառվելու է բացառապես սպանդանոցային միս։ Մեկ սպանդանոց կառուցելու համար անհրաժեշտ է միջինը 35-40 հազար դոլար՝ կախված հզորությունից ու ծավալից:
Ըստ այդմ՝ այս պահին հանրապետությունում գործում է 44 սպանդանոց, որից 19-ը ծառայություններ են մատուցում, մնացածը սեփական կենդանիների մորթն են իրականացնում։
«Այս պահին հստակ կառուցման ընթացքում են 82 սպանդանոց, որի կեսը պատրաստ կլինի մինչև հուլիսի 1-ը, իսկ մնացածը՝ մինչև տարվա վերջ: Հուլիսի 1-ից հանրապետության ամբողջ տարածքում գործելու է սպանդանոցային մորթի պարտադիր պահանջը, իսկ հանրապետության պահանջարկը մինչև 80 սպանդանոց է»,- մեզ հետ զրույցում ասաց ՍԱՏՄ իրազեկման, խորհրդատվության և հանրության հետ կապերի բաժնի պետ, Անուշ Հարությունյանը։
Մեր զրուցակիցը տեղեկացրեց, որ պարբերաբար այցեր կատարվում են արդեն գործող սպանդանոցներ, խորհրդատվություն է տրվում, ցուցումներ։ «Իսկ թերացումների մասով կարող եմ ասել, որ դրանք լինում են այնպիսին, որ հնարավոր է լինում հենց տեղում շտկել»,- ասաց Անուշ Հարությունյանը։
Սպանդանոցներում համապատասխան մասնագետների առումով Անուշ Հարությունյանն ասաց՝ արդեն անցկացրել ու հիմա էլ նորից անցկացնում են անասնաբույժ-փորձագետների վերապատրաստում: «Բոլոր սպանդանոցները որակավորված մասնագետներ կունենան»,- վստահեցրեց ՍԱՏՄ պաշտոնյան՝ ավելացնելով, որ այս պահին գործող սպանդանոցներն արդեն իսկ ապահովված են մասնագետներով։
Նշենք, որ կառավարության որոշման համաձայն՝ քաղաքացիները պետք է 8 տարի ժամկետով 11 տոկոսով վարկ վերցնեն սպանդանոց կառուցելու համար, որի մեծ մասը՝ 7 տոկոսը, կսուբսիդավորվի կառավարության կողմից:
