Համավարակի ավարտից հետո գործուղումները կզիջեն զվարճանքի և հանգստի համար ճանապարհորդություններին: Նման կանխատեսում է արել Airbnb-ի գործադիր տնօրեն Բրայան Չեսկին, հայտնում է Business Insider-ը:
«Նախկինում մարդիկ շատ էին ճանապարհորդում աշխատանքի բերումով, իսկ զվարճանքներ էին փնտրում սոցիալական ցանցերում և համացանցում: Հիմա ամեն ինչ այլ կերպ կլինի: Մենք ավելի շատ աշխատելու ենք համացանցում և զվարճանալու ենք իրական կյանքում», – վստահեցրել է գործարարը:
Նրա կարծիքով՝ ճանապարհորդություններն արագ կմտնեն սովորական կյանք: Միևնույն ժամանակ, մարդիկ ավելի մեծ ուշադրություն կդարձնեն խոշոր քաղաքներից հեռու երկարաժամկետ հանգստին:
«Շատերը հասկանում են, որ չեն ցանկանում կապվել մի քաղաքի հետ: Հետևաբար, կտեսնեք, որ ավելի ու ավելի շատ մարդիկ կսկսեն ամիսներով ապրել աշխարհի տարբեր վայրերում », – եզրափակել է Չեսկին: