Ապրիլի 28-ի դրությամբ՝ Հայաստանում կորոնավիրուսի հաստատված դեպքերի թիվը անցած մեկ օրում աճել է 59-ով, ընդհանուր քանակը 1 867 է։ Գրանցվել է մահվան ևս մեկ դեպք. բուժառուն եղել է 67 տարեկան և ունեցել է քրոնիկ հիվանդություններ:
Հիվանդությունից բուժվածների թիվը ավելացել է 18-ով, ըստ այդմ՝ առողջացածների ընդհանուր թիվը հասել է 866-ի: Իրականացված թեստավորումների թիվը 19 296 է: Հայստանում կորոնավիրուսային հիվանդությունից բուժվում է 971 մարդ: Մահացածների ընդհանուր թիվը 30 է: Մարտի 21-ից մինչև ապրիլի26-ը աշխարհում կորոնավիրուսի հաստատված դեպքերի թիվն աճել է տասն անգամ:
Թեմայի շուրջ «Առաջին լրատվական»-ը զրուցել է Միքայելյան համալսարանական հիվանդանոցի քիթ-կոկորդ-ականջաբան Արթուր Մինասյանի հետ: Մեր զրուցակցի կարծիքով՝ ըստ տվյալների՝ կորոնավիրուսով վարակվածության դեպքերի պիկին դեռ չենք հասել, պիկը դեռ առջևում է: Բժշկի խոսքով՝ պետք է զգույշ լինել, հետևել սահմանափակումներին, պահպանել հիգիենայի կանոնները»:
Առողջապահության համաշխարհային կազմակերպությունը զգուշացնում է՝ Կովիդ 19-ով վարակված և բուժված մարդկանց չի կարելի համարել անվտանգ: Աշխարհի երկրները չեն կարող երաշխավորված լինել, որ կորոնավիրուսով արդեն վարակված և առողջացած անձը չի կարող կրկին վարակվել, քանի որ չկան համոզիչ փաստեր, որ մեկ անգամ կորոնավիրուսով հիանդացած մարդն այլևս չի վարակվի: Արթուր Մինասյանը անդրադարձավ այս դիտարկմանը՝ ներկայացնելով իր պարզաբանումները՝ ընդգծելով, որ ռիսկերը պահպանվում են հիմնականում քրոնիկ հիվանդություններ ունեցողների և ցածր իմունիտետ ունեցող անձանց համար: Նա նաև ընդգծեց, որ պետք է խստորեն պահպանել անձնական հիգիենայի կանոնները և շարունակել շփումների սահմանափակումը:
Մանրամասն՝ տեսանյութում:
